'धागोले बाटेको' बोलको गीत यतिबेला युट्युब, टिकटक र अन्य सामाजिक सञ्जालमा चर्चामा छ।
रचना रिमाल र बाबुल गिरीको स्वर रहेको गीतमाथि थुप्रैले टिकटक र रिल्स भिडिओ बनाएका छन्। सार्वजनिक भएको दुई सातामै गीतको भिडिओलाई युट्युबमा २१ लाखभन्दा बढीपटक हेरिएको छ। गीतमाथि १ लाखभन्दा बढी टिकटक भिडिओ बनेको निर्माणपक्षको दाबी छ।
'दिउँला नि तिमीलाई पछ्यौरी मखमल धागोले बाटेको' बोलको गीत चैत २७ गतेदेखि प्रदर्शनमा आउने तयारीमा रहेको फिल्म 'राम नाम सत्य' को हो। रोमान्टिक शैलीको गीतको भिडिओमा फिल्मका मुख्य कलाकार अभिनेता विराज भट्ट र अभिनेत्री सुपुष्पा भट्टको अभिनय तथा नृत्य हेर्न सकिन्छ।
यो गीतको लोकप्रियतासँगै निर्माण टिमले सन्तुष्टि व्यक्त गर्दै थप ऊर्जा थपिएको बताएको छ।
निर्देशक माइकल चन्दले भने– 'निर्वाचनको छेकोमा हामीले गीत सार्वजनिक गर्दा धेरैले गलत समयमा किन रिलिज गर्नुभयो भनेका थिए। तर गीत हिट हुनेमा हामी विश्वस्त थियौं। आज दर्शकको मुखमा गीत झुण्डिएको छ। लाखौं टिकटक बनेका छन्। यसले हामीलाई उत्साहित बनाएको छ।'
फिल्मकर्मीहरूका अनुसार गीतको चर्चाले खासगरी फिल्मको मार्केटिङमा सकारात्मक प्रभाव पर्छ। फिल्मको नाम र ब्राण्डिङ बढ्छ। गीतले दर्शकको उत्साह र फिल्मप्रति जिज्ञासा बढाउँदा रिलिजको समयमा बढी दर्शक आकर्षित हुने सम्भावना बढी हुन्छ।
तर, गीत चल्दा फिल्मको व्यवसाय राम्रो हुन्छ भन्ने ग्यारेन्टी भने हुँदैन। यस्ता धेरै उदाहरण छन्, जसको गीत चले पनि फिल्मको व्यवसाय कमजोर रहेको थियो।
'राम नाम सत्य' को सन्दर्भमा पनि गीतको लोकप्रियताले पहिलो हप्ता दर्शक तान्न मद्दत पुर्याउन सक्छ। तर फिल्मको अन्तिम सफलता भने कथा, निर्देशन र प्रदर्शन रणनीतिमा निर्भर रहनेछ। सारांशमा भन्नुपर्दा, गीतले फिल्मलाई प्रारम्भिक आकर्षण र चर्चा दिन सक्छ, तर फिल्मको वास्तविक सफलता त्यसपछि निश्चित हुन्छ।
यतिबेला 'धागोले बाटेको' गीतले केवल संगीत प्रेमीको मन जित्दै फिल्मको प्रचारमा पनि महत्वपूर्ण भूमिका खेलिरहेको छ। अब प्रश्न बाँकी छ— फिल्म रिलिज हुँदा यो चर्चाले कति फाइदा पुर्याउँछ?
'राम नाम सत्य' माइकल इन्टरटेन्मेन्ट हाउसको ब्यानरमा निर्माण भएको हो। यसको निर्मातामा उपेन्द्र शाही र स्वेता बिमली छन् भने किशोर भट्ट, राजेन्द्र भट्ट र अर्जुन सुनार कार्यकारी निर्माता हुन्।
फिल्ममा विराज र सुपुष्पाका साथमासुशील श्रेष्ठ, दिव्या रायमाझी, आयुष सिंह ठकुरी, प्रशान्त ताम्राकार, सुनिल थापालगायत कलाकारहरूको अभिनय छ। एक्सन, सस्पेन्स र लभस्टोरी कथामा फिल्म निर्माण गरिएको छ।
-1746009348.jpg)
