निर्देशक तुलसी घिमिरेको निर्देशनमा बनेको फिल्म 'पहाड' को टिजर सार्वजनिक भएको छ।
आइतबार सार्वजनिक टिजरमा सुन्दर पहाडी गाउँ, सुनसान बन्दै गएको बस्ती र विदेशिएका युवाका कारण खाली हुँदै गएको गाउँको अवस्थालाई चित्रण गरिएको छ।
टिजरमा रहेका भावनात्मक दृश्य र संवादले विदेश पलायनले पहाडी समाजमा पारेको असरलाई केन्द्रमा राखेर फिल्मको कथा अघि बढ्ने संकेत गर्छ।
लेखकसमेत रहेका तुलसी घिमिरेले फिल्ममा युवा जनशक्ति विदेश पलायन हुँदा खाली भएका पहाड र यसले ल्याउने सामाजिक र आर्थिक समस्यालाई चित्रण गरिएको बताए।
उनले भने, 'पहाड एकदमै सुन्दर ठाउँ हो। त्यसलाई सुन्दर बनाउन पुर्खा, अग्रजले जीवन समर्पण गरेका छन्। तर पछिल्लो समय त्यही पहाड उजाड बनेको छ, युवा पलयान भएका छन्। रोजगारीका लागि बसाई सरेका छन्। यही यथार्थलाई जोडेर नै फिल्मको कथा तयार गरेका छौं। यसलाई समग्र नेपालकै कथा भन्न सकिन्छ।'
'पहाड' मा विपिन कार्की, सुनिल थापा, मदनकृष्ण श्रेष्ठ, रेनुनाथ योगी, अरूण क्षेत्री, रवीन्द्रसिंह बानियाँ, उमा गिरीलगायतका कलाकारहरूको अभिनय छ। निर्देशक घिमिरेले आफ्नी कान्छी छोरी पञ्चमी घिमिरेलाई यसै फिल्ममार्फत अभिनेत्रीको रूपमा दर्शकसामु ल्याउँदैछन्। फिल्म नयाँ वर्षको दिन बैशाख १ गतेदेखि विश्वव्यापी प्रदर्शनमा आउनेछ।
निर्देशक घिमिरेले वितरकसँग छलफल गर्दै नेपालसँगै अन्तर्राष्ट्रिय प्रदर्शनका लागि उपयुक्त समय मिलाउनुका साथै बाँकी कामलाई पूरा गर्ने अवधि मापन गरेर प्रदर्शन तय गरिएको जानकारी दिए। निर्देशक घिमिरेले यसपटक 'बलिदान' मा काम गरेका मदनकृष्ण श्रेष्ठ, 'चिनो' मा काम गरेका शिव श्रेष्ठ र सुनिल थापालाई पनि 'पहाड' मा कास्ट गरेका हुन्।
फिल्मलाई प्रमोद प्रधानले छायांकन गरेका छन्। भारतमा फिल्म, वेबसिरिज र टेलीफिल्मसमेत छायांकन गरिसकेका छायाँकार प्रधानले निर्देशक घिमिरेसँग ‘अन्याय’, ‘कोसेली’, ‘चिनो’ र ‘दक्षिणा’ लगायतका फिल्ममा सहकार्य गरेका छन्।
'फिल्मको पटकथा तयार गर्दा देखिएका पात्रमा फिट हुने भएपछि पुरानो सहकार्यलाई पुनः ताजा गरौं भनेर मैले प्रस्ताव गरें। मेरो प्रस्तावमा सम्पूर्ण कलाकारले सहमति जनाउनु भयो, पुरानो समयलाई स्मरण गर्दै नयाँ उत्साहका साथ काम गरेका छौं। यसपटक दर्शकसँगै यो फिल्म घर, परिवार र समाजसम्म विचारको रुपमा पुग्छ भन्नेमा विश्वस्त छु,' निर्देशक घिमिरेले भने।
भाग्यरत्न फिल्मस् प्रालिको व्यानरमा निर्माण भएकोे 'पहाड' को प्राविधिक टिममा निर्देशक घिमिरेकी जेठी छोरी भावना घिमिरेले प्रोडक्सन डिजाइनरको जिम्मेवारी सम्हालेकी छिन्।
फिल्ममा रञ्जित सिंह गजमेर संगीत निर्देशक छन् । उत्तम रसाइली प्रस्तुतकर्ता रहेको फिल्ममा सुरेन्द्र लामा थिङ, ओजस्वी केसी, रिम्पोछे लामा थिङ र उमा गिरी निर्माता रहेका छन्। फिल्ममा भारती घिमिरे क्रिएटिभ निर्माता रहेकी छिन्।
नेपालमा वैङ्कटेश इन्टरटेनमेन्ट र डायस्पोरामा सेभेन सिज इन्टरनेशनल फिल्म्सले यसको वितरण गर्नेछ। यसको पब्लिसिटी डिजाइन रोयल भीमसेन र ट्राइडेन्ट कन्सेप्टले गरेको हो। फिल्ममा कविराज गहतराज र मिङमा डी लेप्चाको नृत्य निर्देशन, कुमार महर्जनको द्वन्द्व निर्देशन, शंकर कोइराला र भारती घिमिरेको सम्पादन छ।
फिल्म प्रदर्शनको एक महिनाअघि टिजर दर्शकमाझ ल्याइएको हो।
यस्तो छ टिजरः
-1746009348.jpg)
