वरिष्ठ अभिनेता सुनिल थापाको गत माघमा निधन हुँदा उनी फिल्म 'राम नाम सत्य' को छायांकनमा थिए।
निर्माण टिमका अनुसार भोलिपल्ट फिल्मको क्लाइमेक्स दृश्य खिच्ने तयारी थियो। तर त्यसअघि उनले सधैंका लागि संसार छाडे। उनको निधनपछि फिल्मको बाँकी काम कसरी पूरा गरियो भन्ने चासो दर्शकमाझ हुनसक्छ।
यतिबेला फिल्म 'राम नाम सत्य' देशभरका हलमा प्रदर्शन भइरहेको छ। फिल्म हेर्न जाने दर्शकहरूले सुनिल थापाको आवाज केही फरक रहेको सहजै महसुस गर्न सक्छन्। यसको कारण उनको निधनपछि डबिङ कार्य अर्का कलाकारमार्फत गरिएको हो। दृश्यमा भने कथा अपूरो महसुस हुँदैन।
फिल्मका निर्देशक माइकल चन्दका अनुसार सुनिल थापाको अधिकांश दृश्य छायांकन सकिइसकेको थियो। क्लाइमेक्सको केही दृश्य मात्र बाँकी रहेका कारण निर्माण टिमले व्यवस्थापन गरेर काम पूरा गरेको उनले बताए।
निर्देशक चन्दले भने, 'दुई-चार सीन मात्रै बाँकी थियो। जलाएको सीन बाँकी थियो। कथाअनुसार दैलेखको पाटोमा पनि दाइ हुनुहुन्थ्यो। त्यो हामीले म्यानेज गर्यौं। दाइ जहाँ-जहाँ हुनैपर्ने थियो, त्यो अलमोस्ट सकिएको थियो। क्लाइमेक्स दृश्यमा उहाँलाई जलाउन मात्र बाँकी थियो।'
फिल्ममा सुनिल खलपात्रको भूमिकामा छन्। क्लाइमेक्समा उनको पात्रलाई आगो लगाएर जलाइने दृश्य थियो। सो दृश्यमा डमी कलाकार प्रयोग गरेर छायांकन सम्पन्न गरिएको निर्देशक चन्दले बताए। उक्त दृश्य अभिनेता विराज भट्टसँग सम्बन्धित क्लाइमेक्सको महत्वपूर्ण हिस्सा हो।
सुनिल थापाको निधनपछि चुनौती डबिङमा देखिएको थियो। उनको दृश्यमा आवाज दिने काम डबिङ आर्टिस्ट सुरेन्द्र शाहले गरेका हुन्।
यतिबेला सिनेमा हलमा सुनिल थापाका एकसाथ दुई फिल्म प्रदर्शनरत छन्।
'राम नाम सत्य' सँगै तुलसी घिमिरे निर्देशित फिल्म ‘पहाड’ पनि हलमा प्रदर्शनरत छ। रिलिजका हिसाबले 'पहाड' पछि आए पनि यसको छायांकन अगाडि सकिएको थियो।
फिल्मको व्यवसायको कुरा गर्दा 'राम नाम सत्य' ले २ करोड ७८ लाख १८ हजार रूपैयाँ ग्रस कमाएको छ भने 'पहाड' को कमाइ ४६ लाख ७६ हजार रूपैयाँ छ।
यो गत शनिबारसम्मको कमाइ हो।
