भारतीय अभिनेता धनुष र अभिनेत्री कृति सेनन अभिनीत फिल्म 'तेरे इश्क में' ले बक्स अफिसमा राम्रो सुरूआत गरेको छ।
भारतीय ट्रेड वेबसाइट स्याक्निल्कको रिपोर्ट अनुसार फिल्मले प्रदर्शनको पहिलो दिन भारतीय बक्स अफिसमा १६.५० करोड भारू नेट कमाइ गरेको छ।
चर्चित फिल्म 'रान्झना' को टिमको पुनरागमन र लोकप्रिय संगीतका कारण फिल्मले राम्रो एडभान्स बुकिङ र अकुपेन्सी पाएको थियो। यद्यपि, फिल्मले दर्शकबाट मिश्रित प्रतिक्रिया पाइरहेको छ। शनिबार र आइतबारको व्यापार स्थिर रहेमा पहिलो सप्ताहन्तसम्म फिल्मले ४५ देखि ५० करोड भारू कमाउने अनुमान गरिएको छ।
१६.५० करोडको ओपनिङसँगै 'तेरे इश्क में' सन् २०२५ मा सबभन्दा ठूलो ओपनिङ गर्ने दोस्रो रोमान्टिक फिल्म बनेको छ। यसले 'जोली एलएलबी ३' (१२ करोड) र 'सितारे जमिन पर' (१०.७० करोड) जस्ता ठूला फिल्महरूको पहिलो दिनको कमाइलाई पछि पारेको छ। साथै, यो धनुषको करियरकै सबभन्दा ठूलो ओपनिङ गर्ने हिन्दी फिल्म समेत बनेको जनाइएको छ।
फिल्ममा एकतर्फी प्रेम, जुनून र हिंसात्मक स्वभाव भएको प्रेमीको कथा देखाइएको छ। प्रेमका लागि जे पनि गर्न तयार हुने पागलपन र आक्रोशलाई यसमा मुख्य विषय बनाइएको छ।
आनन्द एल राय निर्देशित 'तेरे इश्क में' नेपालका सिनेमा हलहरूमा समेत प्रदर्शन भइरहेको छ।
-1756446574.jpg)
-1746009348.jpg)
