दक्षिण भारतीय अभिनेता थलापति विजयको अन्तिम फिल्म भनिएको 'जन नायकन' को ट्रेलर सार्वजनिक भएको छ।
शनिबार साँझ सार्वजनिक २ मिनेट ५२ सेकेण्ड अवधिको ट्रेलर एक्सनप्रधान छ। निर्माताले फिल्म रिलिजको ६ दिनअघि ट्रेलर सार्वजनिक गरेका हुन्।
सार्वजनिक ट्रेलरमा विजयलाई जनताको समर्थन पाएका अपराधविरूद्ध कठोर रूपमा प्रस्तुत हुने एक निडर प्रहरी अफिसरको भूमिकामा देखाइएको छ। आफूलाई साधारण व्यक्ति बताउँदै उनले समाजमा फैलिएको अन्याय र अत्याचार अन्त्य गर्ने अठोट लिएका छन्। कथाको क्रममा जब एक निर्दोश पात्रमाथि आक्रमण हुन्छ, त्यसपछि विजयको चरित्र अझ आक्रामक बन्दै जान्छ।
ट्रेलरको अन्त्यतिर बलिउड अभिनेता बबी देओल खलनायकको रूपमा प्रवेश गर्दै विजयलाई चुनौती दिइएको देखाइएको छ।
एच. विनोथ निर्देशित 'जन नायकन' केभीएन प्रोडक्सनले निर्माण गरेको हो। फिल्ममा विजय र बबीसहित पूजा हेगडे, ममिता बैजु, गौतम वासुदेव मेनन, प्रकाश राज, प्रियामणिलगायत कलाकारहरूको अभिनय छ। फिल्म जनवरी ९(पुस २५) देखि प्रदर्शन तयारीमा छ। हिन्दीमा यो फिल्म ‘जन नेता’ शीर्षकमा प्रदर्शनमा आउने छ। नेपालमा पनि फिल्म एकसाथ प्रदर्शन हुने तयारीमा छ।
'जन नायकन' लाई विजयको अन्तिम फिल्मका रूपमा हेरिएको छ। यसपछि उनी पूर्णरूपमा राजनीतिमा सक्रिय हुने घोषणा गरिसकेका छन्।
सन् २०२६ को तमिलनाडु विधानसभा चुनावमा सहभागी हुने उनको तयारी छ।
-1746009348.jpg)
