दक्षिण भारतीय अभिनेता थलापति विजय स्टारर फिल्म 'जन नायकन' को प्रदर्शन अन्तिम समयमा स्थगित हुँदा ठूलो टिकट रकम फिर्ता गरिएको छ।
केन्द्रीय चलचित्र प्रमाणिकरण बोर्ड (सीबीएफसी) बाट समयमै प्रमाणपत्र नपाउँदा अन्तिम समयमा आएर फिल्म रिलिज स्थगित भएको हो।
शुक्रबारदेखि प्रदर्शनमा आउने तयारीमा रहेको फिल्म रोकिँदा भारतमा मात्र अग्रिम टिकट बिक्रीको करिब १ करोड भारू रकम फिर्ता गरिएको जनाइएको छ।
जनवरी ९ (शुक्रबार) मा प्रदर्शनमा आउने तयारीमा रहेकोमा जनवरी ७ को साँझ निर्माणपक्षले अचानक फिल्मको प्रदर्शन अनिश्चितकालका लागि स्थगित गरिएको घोषणा गर्यो। भारतको सेन्सर बोर्डबाट प्रमाणपत्र नआएपछि फिल्मका निर्माता र विजयले मन्द्रास उच्च अदालतमा मुद्धा दायर गरेका थिए।
उद्योग स्रोत र टिकटिङ प्लेटफर्महरूको भनाइ उद्धृत गर्दै हिन्दुस्तान टाइम्सले उल्लेख गरेअनुसार, प्रदर्शन स्थगितपछि बुकमाई शो ले ४ लाख ५० हजारभन्दा बढी टिकटको रकम फिर्ता गर्न प्रक्रिया थालेको थियो।
यो भारतीय फिल्म इतिहासमै सबभन्दा ठूलो टिकट रकम फिर्ता मानिएको छ। व्यापार विश्लेषकहरूका अनुसार भारतमै मात्र करिब १ करोड भारू बराबरको टिकट रकम दर्शकहरूलाई फिर्ता गरिएको छ।
शुक्रबार मन्द्रास उच्च अदालतले भारतको सेन्सर बोर्डलाई 'जन नायकन' लाई प्रदर्शनका लागि अनुमति दिन निर्देशन दिएको छ। तर, प्रमाणिकरण प्रक्रिया अझै भइसकेको छैन।
सेन्सर बोर्डले उक्त आदेशविरूद्ध पुनरावेदन गर्ने तयारी गरिरहेको समेत समाचारमा जनाइएको छ। एच. विनोथद्वारा निर्देशित 'जन नायकन' विजयको अन्तिम फिल्म मानिएको छ।
यो फिल्म नेपालमा पनि शुक्रबारदेखि प्रदर्शनमा आउने तयारीमा थियो।
'जन नायकन' मा विजयसहित बबी देओल, पूजा हेगडे, ममिता बैजु, गौतम वासुदेव मेनन, प्रकाश राज, प्रियामणिलगायत कलाकारहरूको अभिनय छ।
-1746009348.jpg)
