भारतीय फिल्म 'डन ३' लाई लिएर यतिबेला फेरि चर्चा सुरू भएको छ।
फरहान अख्तरको निर्देशनमा बन्ने बहुप्रतीक्षित फिल्ममा बलिउड सुपरस्टार शाहरूख खानको पुनरागमन हुन सक्ने सम्भावनालाई लिएर यो फ्रेन्चाइजको चर्चा भएको हो।
भारतीय संचारमाध्यम नवभारत टाइम्समा प्रकाशित समाचारअनुसार फरहान अख्तर र शाहरूख खानबीच फिल्मलाई लिएर पुनः छलफल सुरू भएको छ।
मिडिया रिपोर्टअनुसार शाहरूख खानले 'डन ३' मा फर्किने संकेत त दिएका छन्, तर त्यसका लागि उनले एक विशेष सर्त राखेका छन्। शाहरूखको चाहना अनुसार यदि दक्षिण भारतीय चर्चित निर्देशक एटलीले यो फिल्मको निर्देशन गर्ने हो भने मात्रै उनी प्रोजेक्टमा आबद्ध हुने विषयमा विचार गर्न तयार छन्। यही प्रस्ताव शाहरूखले फरहान अख्तरसमक्ष राखेका छन्।
शाहरूख खान र निर्देशक एटली यसअघि ब्लकबस्टर फिल्म 'जवान' मा सँगै काम गरिसकेका छन्। एटलीको निर्देशनमा बनेको उक्त फिल्मले बक्स अफिसमा उत्कृष्ट सफलता हात पारेको थियो। सोही सफल सहकार्यका कारण शाहरूख फेरि एटलीसँग सहकार्य गर्न इच्छुक देखिएको नवभारत टाइम्सको रिपोर्टमा उल्लेख छ।
फरहान अख्तर पछिल्लो तीन वर्षदेखि 'डन' फ्रेन्चाइजको तेस्रो श्रृंखलामा काम गरिरहेका छन्। तर, मुख्य कलाकार चयनमा ढिलाइ हुँदा यो प्रोजेक्ट लामो समयदेखि अल्झिँदै आएको छ।
सुरूमा फिल्मका लागि अभिनेता रणवीर सिंहलाई मुख्य भूमिकामा अनुबन्ध गरिएको थियो। तर 'धुरन्धर' फिल्मको सफलतापछि उनले आफैं 'डन ३' बाट अलग भएको बताइएको छ। रणवीर बाहिरिएपछि अभिनेता ऋतिक रोशनलाई पनि 'डन ३' का लागि प्रस्ताव गरिएको थियो। तर उनले पनि यो फिल्ममा काम गर्न अस्वीकार गरेको बताइएको छ।
हाल उनी 'कृष ४' बाट निर्देशनमा डेब्यु गर्ने तयारीमा छन्। उनका हातमा थुप्रै ठूला प्यान–इन्डिया फिल्महरू रहेका कारण उनको कार्यतालिका निकै व्यस्त रहेको बताइएको छ।
-1746009348.jpg)
