प्रतीक्षित बलिउड फिल्म 'बोर्डर २' शुक्रबारदेखि विश्वव्यापी प्रदर्शनमा आएको छ। सनी देओल र वरूण धवन अभिनीत फिल्म मध्यपूर्वका विभिन्न देशहरूमा भने प्रदर्शन नहुने भएको छ।
भारत–पाकिस्तान युद्धको पृष्ठभूमिमा निर्माण गरिएको फिल्ममा पाकिस्तान विरोधी भावना झल्किएको ठहर गर्दै गल्फ क्षेत्रका केही देशहरूले रिलिज अनुमति नदिएको भारतीय संचारमाध्यमहरूले जनाएका छन्।
हिन्दुस्तान टाइम्सका अनुसार बहराइन, कुवेत, ओमान, कतार, साउदी अरेबिया र यूएई लगायतका मुलुकहरूमा 'बोर्डर २' प्रदर्शनमा प्रतिबन्ध लगाइएको छ। यी देशहरूले राजनीतिक तथा सैन्य द्वन्द्वसँग सम्बन्धित संवेदनशील विषयवस्तु भएका फिल्महरूलाई सामान्यतया अनुमति नदिने नीति अपनाउँदै आएका छन्। यसअघि रणवीर सिंह अभिनीत फिल्म 'धुरन्धर' पनि यस्तै कारणले गल्फ देशहरूमा रिलिज हुन सकेको थिएन। भारतमा राम्रो व्यापार गरेको उक्त फिल्मले मध्य पूर्वमा प्रदर्शन नपाउँदा ठूलो विदेशी बजार गुमाएको बताइएको थियो।
अनुराग सिंह निर्देशित 'बोर्डर २' भारत-पाकिस्तान युद्धको कथामा आधारित छ। फिल्मले भारतीय सेनाको साहस, बलिदान र युद्धकालीन अवस्थालाई केन्द्रमा राखेर कथा प्रस्तुत गर्छ।
मध्यपूर्वमा प्रतिबन्ध लागे पनि भारतसहित अन्य अन्तर्राष्ट्रिय बजारमा फिल्म रिलिज भइसकेको छ। दर्शकहरूको चासो उच्च रहे पनि गल्फ देशहरूमा प्रदर्शन नहुनुले फिल्मको समग्र विदेशी आम्दानीमा असर पर्ने विश्लेषण गरिएको छ। यस फिल्मको निर्माता जे.पी. दत्ता, निधि दत्ता र भुषण कुमार रहेका छन्।
सनी देओल र वरूण धवनसँगै फिल्ममा दिलजीत दोसांझ, अहान शेट्टीको लगायतको प्रमुख भूमिका छ। 'बोर्डर २' शुक्रबारदेखि नेपालमा पनि रिलिज भएको छ।
-1746009348.jpg)
