चर्चित भारतीय गायक अरिजित सिंहले पाश्र्व गायनबाट सन्यास लिने घोषणापछि संगीत उद्योग स्तब्ध र आश्चर्य छ।
अरिजितको यो घोषणाप्रति धेरै गायक तथा संगीतकारहरूले प्रतिक्रिया दिएका छन्। वरिष्ठ गायक उदित नारायण झाले अरिजितले संगीतबाट कहिल्यै दूरी नबनाउने विश्वास व्यक्त गरे।
स्क्रिन इण्डियासँगको कुराकानीमा उदित नारायणले अरिजितले छोटो समयमै संगीत क्षेत्रमा असाधारण उचाइ हासिल गरिसकेको बताए। उनले पाश्र्वगायनबाट विश्राम लिने निर्णय गरे पनि संगीतसँग उनको सम्बन्ध नटुट्ने बताए।
'अरिजितले धेरै छोटो समयमा उत्कृष्ट काम गरे। उनले पुरस्कार, लोकप्रियता र दर्शकको अपार माया सबै अनुभव गरिसकेका छन्। उनी यदि सेवानिवृत्त हुने सोचमा छन् भने त्यो व्यक्तिगत निर्णय हो, तर संगीत उनको आत्मा हो। उनी संगीत सिर्जनाबाट टाढा हुन सक्दैनन्', उदित नारायणले भनेका छन्।
अरिजित सिंहले अब नयाँ पाश्र्वगायन प्रोजेक्ट नलिने घोषणा गरेका छन्। यद्यपि उनले संगीत नै छोड्ने घोषणा भने गरेका छैनन्।
अरिजित सिंहको घोषणापछि धेरैले उनको स्वरलाई फिल्मी पर्दामा अझै लामो समय सुन्न चाहेको बताएका छन्। अरिजितको स्वरमा 'ब्याटल अफ गलवान' फिल्मको 'मातृभूमि' गीत केही दिनअघि मात्रै सार्वजनिक भएको थियो।
-1746009348.jpg)
