बलिउड अभिनेता राजपाल यादव फिल्म छायांकनमा फर्किएका छन्। ९ करोड भारू ऋणसम्बन्धी चेक बाउन्स मुद्दामा केही समय हिरासतमा रहेका उनी अदालतको अन्तरिम जमानतपछि रिहा भएका थिए।
तिहाड जेलबाट रिहा भएको केही दिनपछि उनले आफ्नो आगामी फिल्म 'वेलकम टु द जंगल' को छायांकन सुरू गरेका हुन्।
भारतीय संचारमाध्यमहरूका अनुसार राजपाल सोमबार मुम्बई पुगेर फिल्मको छायांकनमा व्यस्त बनेका छन्। उनी सेटमा सक्रिय देखिएको र काममा पूर्ण रूपमा केन्द्रित रहेको जनाइएको छ।
'वेलकम टु द जंगल' बलिउडको प्रसिद्ध 'वेलकम' फ्रेन्चाइजको तेस्रो भाग हो। यसको निर्देशक अहमद खान हुन् भने अक्षय कुमार शीर्ष भूमिकामा छन्। फिल्म सन् २०२६ भित्रै प्रदर्शनमा आउने घोषणा भइसकेको छ।
राजपालको मुद्दाको कुरा गर्दा उनले २०१० मा आफ्नो निर्देशकीय फिल्म 'अता पता लापता' को लागि ५ करोड भारू ऋण लिएका थिए। फिल्म बक्स अफिसमा असफल भएपछि उनी ऋण तिर्न असमर्थ भए। त्यसपछि अभिनेताद्वारा जारी गरिएका सातवटा चेकहरू अनादर गरियो, जसले गर्दा कानुनी कारबाही भयो।
उनको ऋण विस्तारै बढ्दै गएर ९ करोड भारू पुग्यो। फेब्रुअरी २ मा दिल्ली उच्च अदालतले उनलाई आत्मसमर्पण गर्न निर्देशन दिएपछि उनले तिहाड जेलसमक्ष आत्मसमर्पण गरेका थिए। राजपाललाई थुप्रै बलिउडकर्मीले सहयोगको प्रस्ताव गरेका थिए।
-1746009348.jpg)
