बलिउड अभिनेता राजपाल यादवले आगामी सात वर्षसम्म आफूसँग १२ सय करोड भारूको परियोजनाहरू रहेको बताएका छन्।
९ करोड भारू ऋण मुद्दामा जमानत पाएको केही दिनपछि शनिबार मुम्बईमा पत्रकार सम्मेलन गर्दै राजपालले उक्त कुरा बताएका हुन्।
पत्रकार सम्मेलनमा उनले आफ्नो कानुनी लडाइँ, आगामी योजना र विगत एक दशकमा सिकेका पाठहरूबारे कुरा गरे। राजपालले आफूसँग १० वटा फिल्महरू पाइपलाइनमा रहेको बताए।
उनले भने, 'आगामी ७ वर्षका लागि मसँग १२ सय करोड भारू मूल्य बराबरको ब्राण्डिङ परियोजनाहरू छन्। मैले ४ वटा सम्झौता सुनिश्चित गरिसकेको छु, जसमा फिल्महरू समावेश छैनन्। यीमध्ये केही परियोजनाहरू २ सय करोड भारूसम्मका छन् भने केही २ हजार करोडसम्मका प्रोजेक्ट छन्। आम्दानी भनेको परियोजनाहरूमा शुल्क र इक्विटीको मिश्रण हो। मेरा १० वटा फिल्महरू पनि लाइनमा छन्।'
राजपालले जेलमा रहँदा पाएको समर्थनको स्मरण गर्दै भने, 'पछिल्ला २० दिनमा मैले बच्चाहरूका गिफ्टदेखि लिएर सामाजिक सञ्जालमार्फत १ करोड भारूसम्म सहयोग पाएको छु। म यसमा सहभागी सबैलाई धन्यवाद दिन चाहन्छु।'
दिल्ली उच्च अदालतले हालै चेक बाउन्स मुद्दामा मार्च १८ सम्म राजपालको सजायलाई अन्तरिम निलम्बन दिएको छ।
राजपाल अब 'भूत बंगला', 'वेलकम टु द जंगल' लगायतका फिल्ममा देखिने तयारीमा छन्।
-1746009348.jpg)
