भारतीय फिल्म 'द केरला स्टोरी २' को व्यापार कमजोर देखिएको छ। यो फिल्मले प्रदर्शनको ११ दिनमा भारतमा ४०.७८ करोड भारू ग्रस (३४.८५ करोड भारू नेट) कमाइ गरेको हो।
स्याकनिल्कका अनुसार ११ औं दिनमा फिल्मले १.९५ करोड कमाइ गरेको थियो। 'द केरला स्टोरी' को व्यापारको तुलनामा ‘द केरला स्टोरी २' धेरै पछाडि परेको भारतीय संचारमाध्यमले जनाएका छन्।
सन् २०२३ मा रिलिज भएको 'द केरला स्टोरी' ले भारतमा २४१.७४ करोड भारू नेट कमाएको थियो। यद्यपि, सिक्वेल केवल ११ दिन भित्रै हलमा टिक्न संघर्ष गरिरहेको छ।
कमाइमा गिरावट आए पनि फिल्म भने समग्र रूपमा घाटामा नजाने देखिन्छ। किनकि यो फिल्म करिब ३० करोड रूपैयाँ बजेटमा निर्माण भएको बताइएको छ।
कामाख्या नारायण सिंह निर्देशित 'द केरला स्टोरी २' २७ फ्रेब्रुअरीमा रिलिज भएको हो। विवादास्पद विषयका कारण रिलिजअघि फिल्म विवादमा समेत तानिएको थियो।
'द केरला स्टोरी २' मा अदिति भाटिया, उल्का गुप्ता, ऐश्वर्या ओझालगायत कलाकारहरूको अभिनय छ। नेपालमा भने यो फिल्म रिलिजमा आएको छैन।
-1746009348.jpg)
