बलिउडको प्रतीक्षित फिल्म 'धुरन्धर २- धुरन्धरः द रिभेन्ज' ले प्रदर्शन हुनुअघि नै बक्स अफिसमा चर्चा पाइरहेको छ।
रणवीर सिंह अभिनीत फिल्म रिलिज हुन ७ दिन बाँकी रहँदा यसले 'पेड प्रिभ्यू' बाट मात्रै २० करोड भारतीय रूपैयाँ कमाइ गरिसकेको छ। भारतीय मिडिया बलिउड हंगामाका अनुसार बुधबार साँझसम्म फिल्मले 'पेड प्रिभ्यू' बाट उक्त कमाइ गरेको हो।
फिल्मको देशभर अग्रिम टिकट बिक्री तीव्र गतिमा भइरहेको जनाइएको छ। रिपोर्टअनुसार राष्ट्रिय मल्टिप्लेक्स चेनहरूमा मात्रै फिल्मका करिब २ लाख २० हजार टिकट बिक्री भइसकेका छन्।
पेड प्रिभ्यूका लागि शोहरूको संख्या सीमित भए पनि दर्शकको माग भने उच्च देखिएको बलिउड हंगामाले उल्लेख गरेको छ। यही गति कायम रहे टिकट बिक्री ४ लाख नजिक पुग्न सक्ने अनुमान पनि गरिएको छ।
ट्रेड विश्लेषकहरूका अनुसार फिल्मले ३० करोड रूपैयाँको दायरामा अग्रिम बुकिङ गर्ने र पेड प्रिभ्यूमा मात्र ३५ देखि ४० करोड भारतीय रूपैयाँको व्यापार गर्ने लक्ष्य राखेको छ, जुन ऐतिहासिक हुन सक्छ।
आधिकारिक रिलिजभन्दा एक दिनअघि आयोजना गरिने पेड-प्रिमियर शोबाट भएको कमाइले बलिउडमा यसअघि रहेका प्रिमियर कमाइका रेकर्डसमेत तोडेको बताइन्छ।
आदित्य धर निर्देशित 'धुरन्धर' को पहिलो भागले बक्स अफिसमा ठूलो सफलता हासिल गरेको थियो। त्यसैको निरन्तरताका रूपमा निर्माण गरिएको सिक्वेल १९ मार्च (चैत ५) देखि विश्वव्यापी प्रदर्शन तयारीमा छ।
फिल्ममा रणवीरसँगै अर्जुन रामपाल, संजय दत्त, सारा अर्जुन, राकेश बेदीलगायत कलाकारहरूको अभिनय छ। हिन्दीसहित तेलुगु, तमिल, कन्नड र मलयालम भाषामा पनि एकैसाथ रिलिज हुने 'धुरन्धर २' नेपालमा एकसाथ प्रदर्शनमा आउने तयारीमा छ।
-1746009348.jpg)
