भारतीय चलचित्र सेन्सर निकाय केन्द्रीय फिल्म प्रमाणन बोर्ड (सीबीएफसी) ले फिल्म 'जन नायकन' को अनलाइन लिक प्रकरणमा आफ्नो संलग्नता रहेको भन्ने दाबीलाई पूर्ण रूपमा आधारहीन र भ्रामक भनेको छ।
दक्षिण भारतीय सुपरस्टार थलापति विजय अभिनीत 'जन नायकन' हलमा रिलिजअघि नै अनलाइन लिक भएपछि यसबारे विभिन्न प्रश्न र चासो उठेका छन्।
कतिपयले सेन्सर बोर्डबाट लिक भएको हो कि भन्दै बोर्डमाथि औंला उठाएका थिए। यस्तो आशंकापछि बोर्डले शनिबार प्रेस विज्ञप्ति जारी गर्दै फिल्म प्रमाणिकरण प्रक्रिया पूर्ण रूपमा सुरक्षित र नियन्त्रणयुक्त प्रणालीमार्फत सञ्चालन हुने स्पष्ट पारेको छ।
बोर्डका अनुसार फिल्महरूलाई ‘की डेलिभरी मेसेज’ प्रविधिमार्फत सुरक्षित गरिन्छ, जसमा पहुँच केवल निर्माता वा सम्बन्धित पक्षसँग मात्र सीमित हुन्छ।
बोर्डले डिजिटल सिनेमा प्याकेज (डीसीपी) एकपटक निर्मातालाई हस्तान्तरण गरिसकेपछि सीबीएफसीसँग त्यसमा कुनै पहुँच वा नियन्त्रण नरहने जनाएको छ।
सम्बन्धित फिल्मको डिजिटल प्रिन्ट गत मार्च १७ मा मुम्बईमा आधिकारिक रूपमा निर्माताहरूलाई बुझाइएको जनाइएको छ।
'जन नायकन' फिल्मको उच्च गुणस्तर संस्करण अनलाइन लिक भएको खबर सार्वजनिक भएपछि फिल्म उद्योग र दर्शकमाझ तीव्र असन्तोष देखिएको थियो।
फिल्मका निर्देशक एच. विनोथसहित अन्य फिल्मकर्मीहरूले पनि लिक घटनाको कडा आलोचना गर्दै यसलाई 'पीडादायक' बताएका छन्। साथै, निर्माताहरूले गैरकानुनी रूपमा फिल्म वितरण गर्नेहरूमाथि कानुनी कारबाही गरिने चेतावनी दिएका छन्।
बहुप्रतीक्षित 'जन नायकन' आधिकारिक रिलिजअघि नै लिक हुनु फिल्म उद्योगका लागि ठूलो चिन्ताको विषय बनेको छ।
यो फिल्म गत जनवरीमा रिलिज हुने तय गरिएकोमा प्रमाणीकरण समस्याहरूको कारण ढिलाइ भएको थियो। अहिले फिल्मको रिलिज अनिश्चित छ।
'जन नायकन' लाई विजय पूर्ण रूपमा राजनीतिमा सामेल हुनुभन्दा पहिलेको अन्तिम फिल्मका रूपमा हेरिएको छ। सोहीकारण फिल्मलाई लिएर फ्यान एवं शुभचिन्तकहरूमा तीव्र चासो छ।
