बलिउड फिल्म 'धुरन्धर २' ले बक्स अफिसमा ऐतिहासिक उपलब्धि हासिल गरेको छ। यो विश्वभर सर्वाधिक कमाउने दोस्रो भारतीय फिल्म बनेको हो।
फिल्मले लामो समयदेखि कायम रहेको 'बाहुबली २' को कमाइ रेकर्ड पार गर्दै नयाँ कीर्तिमान बनाएको भारतीय संचारमाध्यम दैनिक भास्करले जनाएको छ।
रणवीर सिंह अभिनीत यो फिल्मले रिलिजपछि लगातार उत्कृष्ट व्यापार गर्दै विश्वव्यापी रूपमा ठूलो कमाइ गर्न सफल भएको हो। विभिन्न रिपोर्टअनुसार, 'धुरन्धर २' ले १७८८.३२ करोड भारू कमाएको छ।
'बाहुबली २' ले विश्वव्यापी रूपमा १७८८.०६ करोड भारू कमाएको थियो। विश्वव्यापी सर्वाधिक कमाउने भारतीय फिल्म भने 'दंगल' हो। यसको कमाइ २०७० करोड भारू छ।
फिल्म विश्लेषकहरूका अनुसार निरन्तर राम्रो व्यापार, दर्शकको सकारात्मक प्रतिक्रिया र ठूलो स्केलका कारण यो उपलब्धि सम्भव भएको हो। अहिले पनि फिल्म बक्स अफिसमा मजबुत रूपमा टिकिरहेको छ।
ट्रेड वेबसाइट सैकनिल्कका अनुसार 'धुरन्धर २' ले रिलिजको ४५ औं दिनमा भारतमा २.७७ करोड भारू कमाएको छ।
फिल्मको भारतमा कुल कलेक्सन १,३६२.५७ करोड भारू पुगेको छ।
आदित्य धर निर्देशित यो फिल्म नेपालका सिनेमा हलमा पनि अझै प्रदर्शनरत छ।
