भारतको बहुप्रतीक्षित फिल्म 'रामायण' निर्माण घोषणादेखि नै चर्चामा छ।
ट्रेलर रिलिज मिति नजिकिँदा रणवीर कपूर स्टारर यो फिल्मको चर्चा अझ चुलिँदै गएको छ। हालै यो फिल्मको अन्तर्राष्ट्रिय वितरणका लागि 'सोनी पिक्चर्स' सँग सम्झौता भएको खबर आएको थियो। अहिले फेरि अर्को ठूलो जानकारी बाहिर आएको छ। भारतको प्रतिष्ठित संगीत कम्पनी टी-सिरिजले यस फिल्मको संगीत अधिकार (म्युजिक राइटस्) खरिद गरेको छ।
भारतीय संचारमाध्यम बलिउड हंगामाको रिपोर्ट अनुसार ‘रामायण’को संगीत अधिकार प्राप्त गर्न भारतका धेरै ठूला म्युजिक कम्पनीहरू प्रतिस्पर्धामा थिए। अन्ततः टी-सिरिजले गरेको प्रस्ताव स्वीकार भएपछि सम्झौता टुंगिएको हो।
टी-सिरिजसँग निकट स्रोतलाई उद्धृत गर्दै बलिउड हंगामाले लेखेको छ- 'टी-सिरिजले रामायणका दुवै भागको म्युजिक राइटस् प्राप्त गरेको छ। भुषण कुमार र टी-सिरिजको वरिष्ठ नेतृत्व फिल्मको साउन्डट्र्याकको सम्भावनाप्रति अत्यन्त विश्वस्त छन्।'
समाचारअनुसार यो ७५ करोड रूपैयाँ फिल्मका दुवै भागका लागि दिइएको 'एडभान्स' (अग्रिम भुक्तानी) हो। यो रकम फिर्ता गर्न सकिने सर्तमा सम्झौता गरिएको पनि बताइएको छ।
यो सम्झौता भारतीय संगीत उद्योगमा हालसम्म भएका सबैभन्दा ठूला संगीत अधिकार सम्झौतामध्ये एक मानिएको छ। यसले टी-सिरिजको संगीत व्यवसायमा रहेको प्रभुत्वलाई थप बलियो बनाउनुका साथै 'रामायण'को संगीतप्रति दर्शक र उद्योगको अपेक्षा पनि उल्लेखनीय रूपमा बढाएको बताइएको छ।
'दंगल' फेम निर्देशक नितेश तिवारी निर्देशित 'रामायण'मा कलाकारहरूको ठूलो लाइनअप छ। फिल्ममा रणवीर कपूर, साई पल्लवी, यश, सनी देओल, रवि दुबे शीर्ष भूमिकामा छन्।
यो फिल्मको संगीत अस्कर विजेता ए.आर. रहमान र हलिउडका दिग्गज संगीतकार ह्यान्स जिमरले मिलेर तयार पार्दैछन्।
'रामायण' दुई भागमा निर्माण भइरहेको छ। पहिलो भाग सन् २०२६ को तिहार (दिपावली) र दोस्रो भाग सन् २०२७ को दिपावलीमा रिलिज हुने तय छ।
फिल्मको ट्रेलर बिहीबार विश्वव्यापी रिलिज हुँदैछ।
