भारतीय फिल्म 'मिर्जापुरः द मुभी'ले बक्स अफिसमा आफ्नो बलियो पकड जारी राखेको छ।
गत शुक्रबार रिलिज भएको फिल्मले भारतमा राम्रो कमाइ गरेको हो। फिल्मले पाँचौं दिनसम्म भारतमा १२५ करोड ६० लाख भारू नेट कमाइ गरेको छ।
ट्रेड ट्रयाकर स्याक्निल्कका अनुसार फिल्मले मंगलबार मात्रै भारतमा १५ करोड ८५ लाख भारू कमाएको हो। सोमबार १६ करोड भारू कमाएको फिल्मको पाँच दिनको भारतको कुल ग्रस कलेक्सन १४९ करोड ९७ लाख भारू पुगेको छ।
फिल्मले पहिलो दिन २५ करोड ७५ लाख, दोस्रो दिन ३२ करोड, तेस्रो दिन ३६ करोड र चौथो दिन १६ करोड भारू नेट कलेक्सन गरेको थियो। पाँचौँ दिन पनि कलेक्सनमा ठूलो गिरावट नआएपछि फिल्मको व्यावसायिक यात्रा बलियो देखिएको छ।
भारतबाहिरको कलेक्सन जोड्दा पाँच दिनमा फिल्मको विश्वव्यापी ग्रस कमाइ १७६ करोड ९७ लाख भारू पुगेको स्याक्निल्कको तथ्यांक छ।
'मिर्जापुरः द मुभी' भारतको चर्चित क्राइम-ग्याङ्स्टर वेब सिरिज 'मिर्जापुर' को फिल्म संस्करण हो।
सिरिजका लोकप्रिय पात्र, त्यसमा देखाइएको अपराध, सत्ता र ग्याङ्स्टरको संसारलाई फिल्मको कथामा विस्तार गरिएको छ।
फिल्म गुरमीत सिंहले निर्देशन गरेका हुन् भने लेखन पुनीत कृष्णाले गरेका छन्। रितेश सिधवानी र फरहान अख्तर निर्माता हुन्।
फिल्ममा पंकज त्रिपाठी, अली फजल, दिव्येन्दु, रवि किशन, जितेन्द्र कुमार, अभिषेक बनर्जी, रसिका दुग्गल, मोहित मलिकलगायत कलाकारहरूको अभिनय छ।
'मिर्जापुरः द मुभी' नेपालमा समेत प्रदर्शनरत छ।
-1746009348.jpg)
