गुड फ्राइडे सिनेमा
राम्याको जन्मदिनकै दिन हत्या हुन्छ। हत्यापछि उनकै सामाजिक सञ्जालमा 'अपडेट' पनि हुन्छ।
प्रेमीसँग छुटेको केही समयमै कसैले रासायनिक पदार्थले भरिएको सुई उनको शरीरमा लगाइदिन्छ। त्यसको असरले उनको शरीर पूरै कालो हुँदै जान्छ, अन्ततः उनको मृत्यु हुन्छ।
यस्तै घटना एडिजिपी (प्रहरी) ध्रुवकी छोरीसँग भएको हुन्छ। राम्याको मृत्यु आफ्नी छोरी प्रियाकै जस्तो भएको देखेपछि ध्रुव मुम्बईबाट चेन्नई आइपुग्छन्।
इन्स्पेक्टर श्रुति तथा कन्स्टेबल कालीको सहयोगमा अनौपचारिक रूपमा अनुसन्धानको जिम्मा लिन्छन्।
ध्रुवले अनुसन्धानको सुरूआत राम्याका प्रेमी कार्तिकबाट गर्छन्। कार्तिक एक फोटोग्राफर हुन्।
अनुसन्धान क्रममा ध्रुवले थाहा पाउँछन् कि राम्याको हत्या भएपछि उनको घाँटीमा लगाइएको विशेष डिजाइनको सिक्री हराएको छ। त्यो कार्तिकले नै राम्यालाई उपहार दिएका थिए।
कार्तिकले त्यो सिक्री आफूलाई एक साथीले दिएको बताउँछन् तर त्यसबारे थप जानकारी खुलाउँदैनन्।
अपराधस्थल वरपरका सिसिटिभी क्यामराका भिडिओ हेर्दा राम्याको हत्या भएको समयमा राति एक युवक हतासिँदै दौडिरहेका देखिन्छन्। अनुहार भने प्रस्ट देखिँदैन।
यसैबीच, ध्रुवले एउटा धूलो लागेको कारमा राम्याको सिक्रीसँग मिल्दोजुल्दो डिजाइन कोरिएको देख्छन्।
त्यसको जाँचपछि पहिले लागुऔषध तस्करीको मुद्दामा पक्राउ परिसकेका व्यक्ति तमिलरिवुसम्म पुग्छन्। तमिलरिवु एक पौडीबाज हुन् जोसँग पानीमुनि लामो समयसम्म सास रोक्न सक्ने असाधारण क्षमता हुन्छ।
ध्रुवले उनलाई पक्राउ गरी एकान्त कोठामा राख्छन्।
केही समयपछि तमिलरिवु अस्थिर हुन थाल्छन्। कलंगी सिद्धरद्वारा लेखिएका पुराना भजन जप गर्न थाल्छन्। आफूले नियमित खाने औषधि माग्छन्। त्यसपछि हिंस्रक बन्छन्। अन्ततः बेहोस हुन्छन्।
होस आएपछि तमिलरिवुले आफ्नी पूर्वप्रेमिका राम्या (जो हत्या भएकी राम्याभन्दा फरक व्यक्ति हुन्) का सम्झना बिर्सिन औषधि खाइरहेको बताउँछन्। तमिलरिवुले आफ्नी बहिनी अखिलालाई छाडेर राम्यासँग अमेरिका जान अस्वीकार गरेका थिए। अनि राम्याले उनलाई छाडेकी थिइन्।
तमिलरिवुले प्रहरीहरूले अनुसन्धान गरिरहेको राम्याको हत्यासँग आफ्नो कुनै सम्बन्ध नभएको दाबी गर्छन्।
ध्रुवले थप अनुसन्धान गर्छन्। उनले तमिलरिवुको असाधारण क्षमता र कलंगी सिद्धरबारे थाहा पाउँछन्।
उनी राम्याको सिक्री र तमिलरिवुको रहस्य पत्ता लाउन खोज्छन्।
तर घटनाक्रमहरू यसरी जेलिँदै र जोडिँदै जान्छन्, ध्रुव र उनको टिमको दिमाग नै घुम्छ।
बिस्तारै ध्रुवले यस्ता रहस्यहरू उजागर गर्छन्, जसले दर्शकलाई अचम्मित बनाइदिन्छ।
के तमिलरिवु र मृतक राम्याको केही सम्बन्ध हुन्छ? के ध्रुवकी छोरी र राम्याको हत्यारा एकै हुन्? यसबीच अरू कसैको ज्यान गुम्छ? तमिलरिवुको रहस्य खासमा के हो? यो घटनामा कार्तिक पनि जोडिएका होलान्?
यी सबै जान्न सन् २०२५ को फिल्म 'मार्गन' हेर्नुहोला।
आज गुड फ्राइडे सिनेमामा हामीले तमिल भाषाको यही रहस्यमयी क्राइम थ्रिलर फिल्म सिफारिस गरेका छौं।
-1756794700.JPG)
-1746009348.jpg)
