सामाजिक सञ्जाल खासगरी युट्युबमार्फत दर्शकहरूलाई हँसाउँदै आएका सिक्किमका पदम तामाङ यतिबेला एकपछि अर्को नेपाली फिल्ममा काम गरिरहेका छन्।
युट्युबमा मौलिक कमेडी कन्टेन्टमार्फत लोकप्रिय बनेका पदमले 'होस्टेल ३' बाट नेपाली फिल्ममा डेब्यू गरेका थिए। गतवर्ष प्रदर्शनमा आएको उनको डेब्यू सुपरहिट बन्यो।
उनले आफ्नो अभिनयबाट पनि वाहवाही पाए। यतिबेला पदम दोस्रो फिल्ममार्फत फेरि दर्शकमाझ आएका छन्। उनी अभीनित 'गोबर गणेश' माघे संक्रान्तिको अवसर पारेर बिहीबारदेखि देशभरका सिनेमा हलहरूमा प्रदर्शनमा आएको छ।
पदम यो फिल्मलाई लिएर पनि निकै उत्साहित छन्।
सेतोपाटीसँगको भिडिओ कुराकानीमा उनले आफ्नो भूमिकाबारे भने, 'जब यसको अफर आयो, पात्र हेरेँ। होस्टेलमा अलिकति लाउड खालको क्यारेक्टर थियो। यसको क्यारेक्टर बिल्कुलै फरक पाएँ।'
उनले ‘गोबर गणेश’ मा लुक्स र भूमिकामा मेहनत गरेको बताए।
'यसमा लुक्समा अलिकति मेहनत गरेँ। कहिल्यै कपाल नपाल्ने म, यसमा पालेँ। कलिलो देखिनका लागि म भात खान कम गरेँ,' पदमले भने, 'गुरूङ क्यारेक्टर निर्वाह गरेको छु। आफ्नो तर्फबाट सक्दो मेहनत गरेको छु। अब दर्शकले कसरी लिनुहुन्छ भन्ने कुरामा भर पर्छ।'
'युट्युबले धेरै कुरा दियो'
निम्न वर्गीय परिवारमा जन्मेका पदम केही वर्ष अघिसम्म सिक्किममा कहिले जागिर त कहिले ज्याला मजदुरी गरिरहेका थिए।
परिवारका कान्छो छोरा पदम भन्छन्, 'आमा बिहान उठेर रोटी, चिया पकाएर बसपार्कमा बेच्न जानुहुन्थ्यो। त्यही काम गरेर उहाँले हामीलाई पढाउनुभयो।'
१७ वर्षको उमेरमै आमा गुमाएपछि पदमको जीवन अझै संघर्षपूर्ण बन्यो। त्यसैबीच उनले युट्युब सुरू गरे र क्रमशः राम्रो आम्दानी गर्दै गए।
भारतीय युट्युबहरूले घर, गाडी किनेका भिडिओहरू हेर्दा उनलाई पनि युट्युब खोल्ने सोच बनेको थियो। युट्युबर बन्न ठूलो क्यामेरा चाहिन्छ भन्ने उनको बुझाइ थियो। तर उनीसँग राम्रो मोबाइल समेत थिएन।
पदमका अनुसार उनले ७ वर्षअघि युट्युब सुरू गरेका थिए।
'एक जना साथीले एउटा मोबाइल दियो। त्यतिबेला लाग्यो- अब चाहिँ भिडिओ बनाउन सकिन्छ,' उनी भन्छन्, 'मसँग खास्सै ठूलो योजना थिएन। आफ्नो दैनिकी देखाउने भ्लगिङ गर्ने सोचले युट्युब सुरू गरेको थिएँ।'
त्यसबेला उनी एउटा फ्याक्ट्रीमा जागिरे थिए। समय निकालेर केही महिना निरन्तर भ्लगिङ गरे। एकदिन नजिकका दाइले उनलाई कमेडी भिडिओ बनाउन सुझाव दिए।
'त्यसपछि कमेडी भिडिओ बनाउन थालेँ। त्यो भिडिओ पहिलोपटक १ हजार भ्युज पुगेको थियो,' पदम सम्झन्छन्।
केही महिनापछि कोरोना महामारीका कारण लकडाउन सुरू भयो। त्यस समयमा लामो समयपछि मासु खान पाएको अनुभवबारे उनले भिडिओ बनाए।
'ल बल्ल सिक्किममा मासु काट्यो है भनेर भिडिओ बनाएको थिएँ,' त्यो क्षण सम्झँदै उनले भने, 'भिडिओ अपलोड गरेर काममा गएको थिएँ, बेलुका निस्किँदा त धेरैले मासु भाइ भनेर बोलाउन थाले। सुरूआतमा धेरै भाइरल भएको भिडिओ त्यही थियो।'
अहिले पनि आफूलाई कतिपयले त्यही भिडिओबाट चिन्ने गरेको पदम बताउँछन्। त्यसपछि पदमले छोटा 'रिगरेट' शैलीका भिडिओ बनाउन थाले, जसले झन् लोकप्रियता दिलाए।
'अहिले पनि कतिपयले रिगरेटवाला भाइ होइन भन्नुहुन्छ,' पदमले अनूभूति सुनाए। पदमका भिडिओले लाखौं भ्युज पाउन थाले। नेपालमा समेत उनका भिडिओ रूचाइए।
एकदिन बैंकबाट फोन आएपछि मात्रै आफूले राम्रो आम्दानी गरेको थाहा पाएको पदम बताउँछन्।
'बैंकबाट फोन आएर 'भाइ लोटरी खेल्छौ कि क्या हो?' भनेर सोध्दा अचम्म लाग्यो,' उनले भने। एकैचोटि २ लाख रुपैयाँ युट्युबबाट कमाउँदा उनी उत्साहित भए।
'अर्को महिना दोब्बर कमाएँ। फुट टाइम युट्युबलाई समय दिन थालेँ,' पदम सुनाउँछन्, 'पहिले छानाको घर थियो। ममीले किनेको जग्गामा युट्युबको कमाइले घर बनाएँ। सानोतिनो गाडी चढ्न सकेँ।'
फिल्मको अफर आउँदा सुरूआतमा विश्वास लागेन
पदम सानैदेखि फिल्मप्रेमी थिए। बाल्यकालमा उनले थुप्रै फिल्म हेरेका थिए। पछि युट्युबमार्फत सक्रिय भएपछि उनी दर्शकमाझ परिचित हुँदै गएपछि उनलाई फिल्मको प्रस्ताव आयो। तर सुरूमा उनी फिल्म अभिनयका लागि मानसिक रूपमा तयार थिएनन्।
पदमका अनुसार 'होस्टेल ३' भन्दा अगाडि नै उनलाई फिल्म 'भाइरल गोर्खे' बाट अफर आएको थियो। तर आत्मविश्वासको कमीका कारण उनले त्यो अवसर त्यसबेला स्वीकार गर्न सकेनन्।
'न मैले अभिनयको तालिम लिएको थिएँ। न त एकैचोटि सौगात मल्लजस्तो दिग्गज कलाकारसँग स्क्रिन सेयर गर्ने आँट थियो,' पदमले भने, 'उहाँसँग काम गर्ने इच्छा कसलाई हुँदैन होला। त्यो मेरो लागि ठूलो अवसर थियो। तर त्यसबेला आँट गर्न सकिनँ।'
उनले सिक्किममै बनेको फिल्म 'लिपस्टिक गोलाइ' मा काम गरे। त्यसले फिल्मबारे धेरै कुरा बुझ्न सहयोग पुगेको पदम बताउँछन्।
कमेडी च्याम्पियनबाट चर्चामा आएर अहिले कमेडी दरबार ल्याइरहेका र फिल्म निर्देशनमा समेत डेब्यू गरेका सिक्किमका कमेडियन विक्की अग्रवालले पनि त्यसबेला आफूलाई नेपाली फिल्ममा अघि बढ्न हौसला दिएको पदम बताउँछन्।
उनले 'होस्टेल ३' बाट अफर आउँदा सुरूमा विश्वास गरेका थिएनन्। झापामा फिल्मको टिमसँग भेटघाट भयो।
'स्क्रिप्ट पढ्दा क्यारेक्टर एकदमै राम्रो लाग्यो,' पदमले भने, 'काम गरेँ। दर्शकहरूले पनि भरपूर माया दिनुभयो।'
पदमका अनुसार 'गोबर गणेश' अघि उनलाई भुवन केसी र अनमोल केसीको फिल्म 'बाटुलो जुन' बाट पनि प्रस्ताव आएको थियो।
'उहाँहरूसँग काम गर्ने मौका जुरेको थियो। क्यारेक्टर पनि एकदमै राम्रो थियो,' पदमले भने, 'तर त्यसबेला छोरीको स्कुल सम्बन्धी डकुमेन्टेसनको काम चलिरहेको थियो। त्यससँगै मेरो बेव सिरिजको काम पनि गर्नुपर्ने थियो। नेपालबाट टोली सिक्किम पुगिसकेको थियो। यता भुवन दाइले तीन दिन भित्रमा सेटमा जानुपर्ने भन्नुभयो। समय व्यवस्थापन नमिल्दा उक्त फिल्ममा जोडिन पाइनँ।'
फिल्मको कामको शिलशिलामा काठमाडौं आउँदा पदमले राजेश हमाल, नीर शाह, मदनकृष्ण श्रेष्ठ, भुवन केसीजस्ता दिग्गज कलाकारहरूसँग भेट्ने अवसर पाए। त्यो अनुभूति सुनाउँदै उनले भने, 'सानैदेखि पर्दामा हेर्दै आएको कलाकारहरूलाई साक्षात भेट्दा धेरै शब्दै निस्किएन। उहाँहरू बोलिरहँदा कुरा सुन्नुभन्दा पनि उहाँहरूलाई निहुँरिएर हेरिरहेँ।'
ती भेटघाटहरूबाट अग्रज कलाकारहरूको सोच, अनुशासन र पेसागत प्रतिबद्धताबारे धेरै कुरा सिक्न र बुझ्न पाएको पदम बताउँछन्।
सामाजिक सञ्जालबाट सुरू भएको पदमको यात्रा अब ठूलो पर्दामा बिस्तार मात्र भएको छैन, उनले ठूलो पर्दामा पनि दर्शकहरूबाट माया पाइरहेका छन्। उनी आफ्नो जीवनका संघर्ष र सफलतामा सधैं दर्शकको भूमिकालाई अग्रस्थानमा राख्छन्।
उनी भन्छन्, 'दर्शकले माया नगरेको भए आज म यहाँ हुने थिइनँ।'
पदम फिल्म अभिनयलाई निरन्तरता दिन चाहन्छन्।
'फिल्म गरिरहन पाऊँ। आफूलाई डेडिकेसन दिएर नेपाली फिल्ममा काम गर्नेछु। त्यसका लागि मेहनत पनि गरिरहेको छु। टोन पनि धेरै इम्प्रुभ गरेको छु,' पदमले भने, 'सन् २०२६ मा धेरै काम गर्नु छ। केही फिल्महरूमा काम गर्ने पक्का भइसकेको छ। फिल्ममा आएपछि युट्युब बिर्सेँ भनेर कहिल्यै नसोच्नू। अब बेव सिरिज 'साकालाबिन्दु' पनि लिएर आउनेछु।'
उनी आफूलाई एक्सन फिल्ममा पनि काम गर्न मन लागेको बताउँछन्। यद्यपि आफूलाई हिरो हुने चाहना नरहेको उनले प्रष्ट पारे। भने, 'मलाई हिरो हुनु छैन। सपोर्टिङ क्यारेक्टर प्ले गर्ने सोचले नै फिल्ममा आएको हो।'
बाँकी भिडिओमाः
-1768476586.jpg)
-1746009348.jpg)
