तीन महिनादेखि सुस्ताएको नेपाली फिल्मको व्यापार नयाँ वर्षमा चलायमान देखिएको छ।
माघ १६ गते रिलिज 'आबाट आमा' ले नेपालमा १३ करोड १३ लाख रूपैयाँभन्दा बढी ग्रस कमाइ गर्दै उल्लेखनीय सफलता हासिल गर्यो। तर त्यसपछि प्रदर्शनमा आएका कुनै नेपाली फिल्म राम्रो चलेका थिएनन्।
यो बीचमा 'कुमारी', 'रमिताको पिरती', 'बिगुल', 'श्री बुकुरो', 'शिवांस', 'प्रवासी जीवन', 'लालीमा', 'हामी तीन भाइ' लगायत फिल्महरू बक्स अफिसमा असफल रहे।
यसैबीच, नयाँ वर्षको छेको पारेर गत शुक्रबार रिलिज फिल्म 'राम नाम सत्य' पछिल्ला फिल्महरूको तुलनामा राम्रो सुरूआत गर्यो। पहिलो चार दिन सुखद् व्यापार गरेको फिल्मको व्यापार नयाँ वर्षको पहिलो दिन मंगलबार देशभर उत्साहजनक देखिएको छ।
आधिकारिक बक्स अफिस रिपोर्ट सार्वजनिक नभए पनि प्राप्त शोमा मंगलबार अकुपेन्सी उच्च रह्यो। वितरक गोविन्द शाहीका अनुसार बिहानदेखि रातिसम्मका धेरै शो हाउसफुल रहे। उनले भने, 'एकदमै राम्रो रह्यो। बिहानैदेखिका शो हाउसफुल रहे। पाँचौं दिनमा आएर दर्शक थपिनु सुखद् संकेत हो।'
हल भिजिटमा रहेका अभिनेता विराज भट्टले फिल्मले अपेक्षाअनुसार प्रतिक्रिया पाइरहेको बताए। उनले भने, 'हामीले नयाँ वर्षलाई लक्षित गरेर रिलिज गरेका हौं। ओपनिङ कस्तो हुन्छ भन्ने चिन्ता थियो। रिलिजको दिन डर लागेको थियो। तर ओपनिङ राम्रो भयो, त्यसपछि ढुक्क भयौं। वर्ड अफ माउथ पनि राम्रो भयो। नयाँ वर्षमा अत्यन्त राम्रो रह्यो।'
त्यस्तै, मंगलबारबाट रिलिज फिल्म 'पहाड' ले पनि सुखद् सुरूआत गरेको देखिन्छ। यो फिल्मको पहिलो दिन अकुपेन्सी सुखद् देखिएको छ। कतिपय शोहरू हाउसफुल समेत भएको निर्माण पक्षले जनाएको छ।
फिल्मले दर्शकबाट प्रतिक्रिया पनि सकारात्मक पाएको छ। निर्देशक तुलसी घिमिरेले फिल्मप्रति उत्साहजनक प्रतिक्रिया आएको बताए।
उनले भने, 'यसको प्रतिक्रिया साह्रै राम्रो आएको छ। चारैतिरबाट जुन प्रतिक्रिया आएको छ, त्यसले एकदमै उत्साहित बनाएको छ।'
अभिनेता विपिन कार्कीले हल भिजिटका क्रममा दिउँसोपछि राम्रो माहोल बनेको बताए।
उनले भने, 'बिहानसम्म खासै चहलपहल थिएन, सुनसानजस्तै देखिएको थियो। तर दिउँसोदेखि एकदमै राम्रो माहोल बन्यो।'
नेपाली फिल्म उद्योगका लागि नयाँ वर्षलाई व्यापारका हिसाबले महत्वपूर्ण समय मानिन्छ। बिदा, उत्सवको माहोल र पारिवारिक घुमफिरसँगै यो समयमा हलहरूमा दर्शकको चाप बढ्ने अपेक्षा रहन्छ।
'राम नाम सत्य' माइकल चन्द निर्देशित एक्सन ड्रामा हो। यसमा विराज भट्ट, सुशील श्रेष्ठ, सुनिल थापा, सुपुष्पा भट्ट, दिव्या रायमाझी, आयुष सिंह ठकुरी, खुसी कार्की, लगायत कलाकारहरूको अभिनय छ। फिल्मको निर्माता उपेन्द्र शाही र श्वेता बिमली हुन्।
त्यस्तै, 'पहाड' वरिष्ठ निर्देशक तुलसी घिमिरे निर्देशित सोसल ड्रामा हो। यसमा मदनकृष्ण श्रेष्ठ, सुनिल थापा, शिव श्रेष्ठ, विपिन कार्की, रवीन्द्र सिंह बानियाँ, अरूण क्षेत्री, पञ्चमी घिमिरेलगायत कलाकारहरूको अभिनय छ।
रिन्पोछे थिङ, सुरेन्द्र थिङ, ओजश्वी केसी, दमन्ति रसाइली, उमा गिरी फिल्मको निर्माता हुन्।
प्रमोद प्रधानको छायांकन रहेको फिल्ममा सम्पादन भारती घिमिरे र शंकर कोइरालाको छ।
यो पनिः नयाँ वर्षमा फिल्म घोषणाको ओइरो
