नेपाली फिल्म क्षेत्रमा लामो समयदेखि भनिँदै आएको छ- असार, साउन रिलिजका लागि 'अफसिजन' हो।
खासगरी वर्षायाम र खेतीपातीको समय भएकाले दर्शकहरूको उपस्थिति कम हुने कारण देखाउँदै धेरै निर्माता तथा वितरक यो समयमा फिल्म रिलिज गर्न हिच्किच्याउँछन्।
अझ ठूलो बजेटका भनिएका फिल्महरू यस समयमा कमै रिलिज हुन्छन्।
धेरैको ध्यान नै चाडपर्व तथा सार्वजनिक बिदामा देखिन्छ। तर अरूण क्षेत्री र सिम्रन खड्का अभिनीत फिल्म ‘गौंथली’ले भने फरक माहोल देखाएको छ।
डा. कपिल रिजालको निर्देशनमा बनेको फिल्म साउन १ गते रिलिज भएको थियो। यसले पहिलो दिनदेखि नै दर्शकको उत्साहजनक साथ पाएको प्राप्त शोमा बुकिङ हेर्दा देखिन्थ्यो। फलस्वरूप फिल्मले बक्स अफिसमा पनि लगातार राम्रो व्यापार गरिरहेको छ।
काठमाडौंसहित देशभरका सिनेमा हलमा यो फिल्मको व्यापार उत्साहजनक रहेको स्पष्ट देखिन्छ। खासगरी काठमाडौंसहित मध्य नेपाल र पश्चिममा व्यापार उत्साहजनक छ।
चलचित्र विकास बोर्डको आधिकारिक बक्स अफिस रिपोर्ट त सोमबार सार्वजनिक हुनेछ। यद्यपि, बोर्ड स्रोतले सेतोपाटीलाई दिएको जानकारीअनुसार शुक्रबार दिउँसो १२ बजेसम्म फिल्मले ४ करोड रूपैयाँभन्दा माथिको ग्रस कमाइ गरिसकेको छ। १ लाख ५३ हजारभन्दा बढी टिकट बिक्री भएका छन्।
यो फिल्म हेर्न हलहरूमा देखिएको दर्शकको चापले स्वयं फिल्मकर्मीहरूलाई पनि आश्चर्यमा पारेको छ। वर्षायाममा रिलिज भएर यसरी दर्शक आकर्षित गरेको यो सम्भवतः धेरै वर्षपछि हो।
निर्माता सुमन गिरी प्रदर्शन मिति तय गर्दा निर्माण टिम आफ्नो प्रोजेक्टप्रति पूर्ण रूपमा विश्वस्त रहेको बताउँछन्। वितरकको सुझावअनुसार अन्य नेपाली फिल्मसँग प्रत्यक्ष प्रतिस्पर्धा नहुने समय रोजेर फिल्म प्रदर्शनमा ल्याइएको उनको भनाइ छ।
निर्माता गिरीले भने, 'हामी जुनसुकै समयमा पनि आउन तयार थियौं। हलिउड फिल्म 'द ओडिसी' आउँदैछ भन्ने पनि थाहा थिएन। तर हामी आफ्नो प्रोजेक्टप्रति विश्वस्त थियौं। यो मितिमा अन्य नेपाली फिल्म पनि नभएकाले कसैलाई असर नपर्ने भन्दै वितरकको सल्लाहअनुसार रिलिज रोज्यौं।' सकारात्मक 'वर्ड अफ माउथ'का कारण प्रदर्शनलाई थप बल मिलिरहेको गिरीले बताए।
वितरक भन्छन्- फिल्म बलियो भए रिलिज मितिले अर्थ राख्दैन
'गौंथली' का वितरक करण श्रेष्ठ फिल्मको सफलतामा रिलिज मितिभन्दा कन्टेन्ट र टिमवर्क नै निर्णायक हुने बताउँछन्। राम्रो फिल्म बनेपछि कुन मितिमा प्रदर्शन गरियो भन्ने कुराले अर्थ नराख्ने उनको भनाइ छ।
'अहिलेसम्मको अनुभवका आधारमा फिल्म चल्न पहिलो सर्त नै फिल्म राम्रो हुनुपर्छ। फिल्म बलियो भयो भने रिलिज डेटले खासै अर्थ राख्दैन,' वितरक श्रेष्ठले सेतोपाटीसँग भने, 'सबै पक्ष एक भएर मार्केटिङ गरियो भने त्यसले पनि व्यापारमा ठूलो प्रभाव पार्छ।'
उसो त उनको यसअघि पनि असार-साउनमा फिल्म रिलिज गर्नेबारे थुप्रै निर्मातासँग छलफल हुन्थ्यो। तर अन्तिम निर्णय भने निर्माण पक्षकै हुने भएकाले सबैले सहजै स्वीकार गर्न गाह्रो मान्थे।
'म फिल्म राम्रो छ भने जहिल्यै रिलिज गर्दा पनि हुन्छ भन्छु। असार-साउनमा रिलिज गरौं भनेर पनि कतिपयलाई सुझाव दिन्छु। तर निर्माता तयार हुनुभएन भने अघि बढ्न सकिँदैन,' वितरक श्रेष्ठले भने, 'किनकि रिलिज मितिको अधिकार उहाँहरुकै हुन्छ। 'गौंथली'को हकमा पनि टिमसँग सल्लाह गरेर यही समय रोजेका हौं।'
वितरक श्रेष्ठ २०७६ सालमा 'घर' फिल्म साउन ३ गते रिलिज गरिएको र त्यो फिल्मले पनि सन्तोषजनक व्यापार गरेको सम्झन्छन्।
पछिल्ला वर्ष भने असार-साउनमा कम फिल्म आए। आएका फिल्मले पनि अपेक्षाअनुसार व्यापार गर्न सकेनन्। त्यसैले पनि निर्मातामा यो समयप्रति डर देखिएको हुनसक्ने श्रेष्ठको बुझाइ छ।
'गौंथली' दोस्रो सातामा आउँदा पहिलो दिनभन्दा अझ धेरै शोसहित प्रदर्शन भइरहेको छ।
सुरूआतमा करिब २०० शोमा प्रदर्शनमा आएको फिल्म अहिले करिब ३०० शोसम्म पुगेको श्रेष्ठले बताए।
के छ 'गौंथली'मा?
'गौंथली' एक किशोरीको कथा हो, जसले पढेर आफ्नो भविष्य बनाउन चाहन्छे। तर परिस्थितिले उसको विवाह फरक क्षमता भएका युवकसँग हुन्छ। त्यसपछि उसको संघर्ष, आत्मविश्वास र जीवनलाई आफ्नै बलमा अगाडि बढाउने यात्राको कथालाई फिल्मले प्रस्तुत गर्छ। सामाजिक तथा फ्यामिली ड्रामा विधामा फिल्म बनेको छ।
'गौंथली'को कथा डा. भोला रिजालको हो। उनले दुई दशकअघि 'गौंथली' नाममा गीति फिल्म निर्माण गरेका थिए, जसलाई नेपालको पहिलो गीति (म्युजिकल) फिल्म मानिन्छ।
अहिले सोही नाममा उनका छोरा डा. कपिल रिजालले नयाँ कथावस्तुसहित फिल्म निर्देशन गरेका हुन्। यसअघि डेब्यु फिल्म 'ह्यारीकी प्यारी' राम्रो चल्न नसके पनि कपिल रिजालले दोस्रो फिल्मबाट सफलता पाएका हुन्।
