राष्ट्रिय लोक तथा दोहोरीगीत प्रतिष्ठान नेपालको केन्द्रीय अध्यक्षमा निर्वाचित भएपछि पशुपति शर्माले संस्थाभित्र एकता कायम गर्दै सबैलाई समेटेर अघि बढ्ने बताएका छन्।
प्रतिष्ठानको नवौं केन्द्रीय महाधिवेशनबाट उनी अध्यक्षमा निर्वाचित भएका हुन्। पशुपतिले सामाजिक सञ्जाल फेसबुकमार्फत आभार व्यक्त गर्दै निर्वाचनका क्रममा उत्पन्न तिक्तता बिर्सेर सबैलाई मिलाएर अघि बढ्ने प्रतिबद्धता जनाएका हुन्।
उनले लेखेका छन्, 'महाधिवेशनका क्रममा उत्पन्न भएका तिक्तताहरूलाई बिर्सेर मनहरू जोड्ने, दुःखेका मनहरूमा मलम लगाउने र असन्तुष्टिलाई संवाद, सहकार्य र आपसी सद्भावबाट सम्बोधन गर्ने मेरो इमानदार प्रयास रहनेछ।'
निर्वाचनमा कसैले आफूलाई समर्थन गरेको र कसैले फरक विचार राखेको भए पनि अब सबै मिलेर संस्थाको हितमा काम गर्नुपर्ने उनको भनाइ छ।
पशुपतिले अगाडि लेखेका छन्, 'निर्वाचनमा कसैले समर्थन गर्नुभयो, कसैले फरक विचार राख्नुभयो होला। तर अब हामी सबै एउटै परिवारका सदस्य हौं। प्रतिस्पर्धा महाधिवेशनसम्म सीमित रहोस्, एकता र सहकार्य हाम्रो कार्यकालको पहिचान बनोस्।'
उनले संस्थालाई बलियो बनाउन केन्द्रीय कार्यसमिति मात्र नभई देशभरका प्रदेश, जिल्ला, स्थानीय तह, उपत्यका समन्वय समिति, मातहतका समिति तथा विदेश विभागमा आबद्ध सबैको साथ र सहयोग आवश्यक रहेको बताएका छन्।
पशुपतिले हरेक कलाकारले प्रतिष्ठानलाई आफ्नै संस्था ठान्ने वातावरण बनाउनु आफ्नो प्राथमिकता हुने पनि बताएका छन्।
संस्थाको गरिमा जोगाउँदै कलाकारको हकहित, स्रष्टाको सम्मान तथा नेपाली लोक तथा दोहोरी गीतसंगीतको संरक्षण, संवद्र्धन र विकासमा सबै मिलेर काम गर्नुपर्ने उनको भनाइ छ।
