नेपाली सफ्ट्वेयर कम्पनी अकोर अमेरिकामा तीव्र विकास गर्ने उत्कृष्ट निजी कम्पनी (फास्टेड ग्रोइङ प्राइभेट कम्पनिज) को सूचीमा सूचीकृत भएको छ।
चर्चित अमेरिकी आर्थिक म्यागेजिन आईएनसीको सन् २०२५ को वार्षिक रिपोर्टमा नेपाली आइटी कम्पनी अकोर सूचीकृत भएको हो। अकोर अमेरिका र नेपाल दुवै मुलुकमा दर्ता भएको कम्पनी हो।
न्यूयोर्कमा मुख्यालय रहेको आइएनसी म्यागेजिनको प्रकाशन सन् १९७९ बाट सुरु भएको थियो। अमेरिकी आर्थिक तथा व्यापारिक जगतमा प्रतिष्ठित मानिने आइएनसीले हरेक वर्ष छिटोछिटो आर्थिक प्रगति गर्ने उत्कृष्ट निजी कम्पनीहरुको सूची सार्वजनिक गर्दै आएको छ।
सन् २०१९ मा स्थापित नेपाली सफ्टवेयर कम्पनी अकोरले अमेरिकी बजार लक्षित स्टाफिङ (मानव संशाधन) सम्बन्धी सफ्टवेयर निर्माण गर्दै आएको छ।
कम्पनीले गर्ने व्यापार र आम्दानी वृद्धिलाई आधार मानेर गरिएको सर्वेक्षणमा अकोर ३०२औं नम्बरमा परेको हो। सर्वेक्षणमा अकोर जस्तै आईटी र सफ्टवेयर गरी ५ हजार कम्पनी संलग्न थिए। जसमध्ये अकोर सफ्टवेयर कम्पनीमध्येमा तीव्र विकासशील कम्पनीको ३०२ स्थानमा अटाउन सफल भएको हो।
अकोरले पछिल्लो तीन वर्षमा १५५ प्रतिशत आम्दानी वृद्धि गरेको आइएनसीले जनाएको छ। आइएनसीले आम्दानी वृद्धि एवं ग्राहक संख्या तथा बजार विस्तार रणनीतिजस्ता सूचकाङ्कमा प्रतिस्पर्धा गराएर कम्पनीहरुलाई सूचीकृत गर्ने गरेको छ।
अकोर नेपाली युवा इन्जिनियरद्वय सन्दीप आचार्य र समर बस्नेतद्वारा स्थापित कम्पनी हो।
अकोरको कार्यालय नेपालमा श्रीकृष्ण सदन, नयाँबानेश्वरमा र अमेरिकाको टेक्सासमा छ। कम्पनीले स्टाफिङ कम्पनीका लागि सफ्टवेयर बनाउँदै आएको छ।
अकोरका सह–संस्थापक एवं प्रमुख कार्यकारी अधिकृत (सिईओ) सन्दीप आचार्यले कम्पनीले ग्राहकहरुबाट पाएको माया, विश्वास र प्रेरणा तथा ‘टिम वर्क’ का कारण उक्त ऐतिहासिक सफलता हासिल गर्न सम्भव भएको बताए।
नेपाल र अमेरिका दुवैतिर गरी करिब १ सय ७० कर्मचारी अकोरमा कार्यरत छन्। अकोरले निर्माण गर्ने सफ्टवेयर नयाँ कर्मचारी भर्नादेखि व्यवसायिक तालिम, कामको अवधि, पारिश्रमिक, कर्मचारीको मूल्याङ्कन आदि विषय निगरानी गर्नुका साथै सिफ्ट व्यवस्थापनको काममा समेत प्रयोग हुन्छ।
कम्पनीले कृत्रिम बौद्धिकता (एआई) आधारित सफ्टवेयरमार्फत श्रम व्यवस्थापनलाई सहज बनाएको भनाइ सिइओ आचार्यको छ।
आचार्यले नेपाल अमेरिकी र अरु पश्चिमा मुलुकका लागि ‘आउटसोर्सिङ’ मात्र नभई सफ्टवेयर उत्पादन गर्ने देशका रुपमा पहिचान बनाउने अवस्थामा आइपुग्नु सन्तोषको विषय भएको बताए।
‘पहिला–पहिला सफ्टवेयर भनेको अमेरिकामा मात्र बन्छ, नेपालमा अमेरिकीहरुले आउटसोर्सिङका लागि मात्र दिन्छन् भन्ने बुझाइ थियो’, आचार्यले भने, ‘तर, हामी त्यो बिन्दुबाट प्रतिस्पर्धी क्षमतासहित धेरै माथि उठिसकेका छौं। अहिले हाम्रा प्रोडक्ट अमेरिकी कम्पनीले प्रयोग गरिरहेका छन्। अब अमेरिकनले काम लगाउने र नेपालीले काम गर्ने मात्र अवस्था रहेन।’
नेपाली कम्पनीबाट उत्पादित सफ्टवेयरले अमेरिकाजस्तो प्रतिस्पर्धी बजारमा विश्वास जित्नु आफूहरुका लागि मात्र नभई समग्र नेपाली सूचना प्रविधि उद्योगका लागिसमेत खुसी र गर्वको विषय भएको उनले उल्लेख गरे।
‘नेपाली कम्पनीले अमेरिकाजस्तो प्रतिस्पर्धात्मक बजारमा स्थापित गरेको यो उदाहरणले अन्तर्राष्ट्रिय बजारमा नेपाली सफ्टवेयर व्यवसायको उज्यालो भविष्य देख्न सकिन्छ’, उनले भने, ‘हाम्रो सफलता अरु नेपाली स्टार्टअप र व्यवसायिक समूहलाई पनि विश्व बजारमा प्रवेश गर्ने प्रेरण बन्न सक्छ भन्ने विश्वास हामीलाई छ।’
अमेरिकामा स्थायी र अस्थायी कर्मचारी उपलब्ध गराउने ३० हजारभन्दा बढी स्टाफिङ कम्पनी रहेकाले बजारको समस्या नरहेको उनी बताउँछन्। नेपालमा नयाँ नयाँ सफ्टवेयरको आइडिया भएका जनशक्ति पर्याप्त मात्रामा उत्पादन भइसकेको उनले उल्लेख गरे।
स्टाफिङ कम्पनीलाई सफ्टवेयर बेच्नेमध्ये आभियोन्ते (Avionté) अमेरिकाको दोस्रो ठूलो कम्पनी हो। सन् २००४ मा स्थापित आभियोन्ते सन् २०१४ मा आचार्यले नै सेरेन्ट क्यापिटल नामक अमेरिकी कम्पनीलाई बेचेका थिए। आचार्यले अब आफूहरुको प्रतिस्पर्धा सोही कम्पनीसँग हुने बताए।
‘हामीले बेचेको कम्पनी आभियोंते अमेरिकामा स्टाफिङ सफ्टवेयर निर्माण गर्ने दोस्रो ठूलो कम्पनी हो। अब हाम्रो प्रतिस्पर्धा त्यही कम्पनीसँग हुन्छ,' उनले भने।
अमेरिकामा स्टाफिङ सफ्टवेयर निर्माण गर्ने सबैभन्दा ठूलो कम्पनी बुलहर्न सफ्टवेयर हो। जसको वार्षिक आम्दानी करिब ४० अर्ब नेपाली रुपैयाँ छ।
‘हाम्रो लक्ष्य नम्बर वान कम्पनी बन्ने हो। आभियोन्तेले करिब १७ अर्ब नेपाली रुपैयाँ बराबर वार्षिक आम्दानी गर्छ। अबको ६/७ वर्षमा हामी आभियोन्तेलाई उछिन्ने लक्ष्यसहित काम गर्दैछौं,’ आचार्यले भने।
-1755241369.jpg)
-1746009348.jpg)
