अस्ट्रेलियाको ब्रिसबेनमा छ '८८४८ मःम'।
सगरमाथाको उचाइलाई जोडेर नाम राखिएको यो रेस्टुरेन्टका सञ्चालक हुन् होम प्यासी।
लमजुङ मूलघर भएका होमले सन् २०१८ मा यो रेस्टुरेन्ट खोलेका थिए। ८८४८ मःम अस्ट्रेलिया र न्युजिल्यान्डका विभिन्न ठाउँमा फैलिसकेको छ। यही वर्षदेखि भारतमा पनि फैलिँदैछ।
'यो वर्ष भारतमा ३ सय वटा शाखा खुल्ने गरी त्यहाँको बालाजी ग्रुपसँग सम्झौता भएको छ,' होमले भने।
उनका अनुसार भारतमा ८८४८ मःमको फ्रेन्चाइज ५० करोड भारतीय रूपैयाँमा बेचिएको हो। भारतमा मःम उत्पादन उद्योग पनि बनाइएको छ। उद्योगमा पनि आफ्नो लगानी रहेको उनले बताए।
'हामी अहिले सिस्टम निर्माण र मःम विस्तारमा केन्द्रित छौं। विश्वभरि फ्रेन्चाइज पुर्याउने महत्वाकांक्षी योजना छ,' होमले भने, 'भारतका लागि सम्झौता भएसँगै यसको माग पनि बढेको छ। यो हाम्रा लागि गर्वको विषय हो।'
अस्ट्रेलिया र न्युजिल्यान्डका लागि भने ब्रिसबेनमै मःम बन्छ। साताको पाँच दिन दैनिक दुई लाख वटा मःम बनाइने उनको भनाइ छ। सँगै मःमका लागि चाहिने अचार, चाउमिन, सस, सेकुवा लगायत बनाउँछन्। मुख्य ब्रान्ड भने मःम नै भएको उनले बताए।
८८४८ मःम जर्मनी र अमेरिका पनि पुग्दैछ। ती ठाउँमा मःम उद्योग बनिरहेका छन्। यसबाहेक युएई, बेलायत लगायत देशमा पनि पुर्याउने तयारी भइरहेको उनले बताए।
लमजुङको खुदीका होम सन् २००९ मा सामान्य विद्यार्थीका रूपमा क्विन्सल्यान्ड पुगेका थिए।
उनमा काम गर्ने हुटहुटी र महत्वाकांक्षा औधि थियो।
आमाबुबा उनी डाक्टर वा इन्जिनियर बनून् भन्ने चाहन्थे। पढाइ पनि राम्रो थियो। त्यसैले उनी काठमाडौं आए र इन्जिनियर पढ्ने भनेर पछि अस्ट्रेलिया उडे।
तर उनले आमाबुबालाई झुक्क्याएका थिए।
'मलाई त इन्जिनियरिङबाट उम्किनु थियो। त्यसैले यता आएर छाडेँ र हस्पिटालिटी तथा एकाउन्टिङ पढेँ,' उनले भने।
होमले सन् २०११ मा साथीहरूसँग मिलेर सनसाइन कोस्टमा गोर्खाली नेपाली रेस्टुरेन्ट सुरू गरे। त्यो बेला उनी क्राउन प्लाजा रेस्टुरेन्टमा पनि काम गर्थे। सन् २०१४ मा उनले साइनकोष्टमा युवा व्यवसायीको सम्मान पाए।
सनसाइन कोस्टको आफ्नो रेस्टुरेन्टलाई उनी फ्रेन्चाइज गराउन चाहन्थे। सफल हुन सकेनन्।
उनले इटालियन रेस्टुरेन्ट पनि खोलेका थिए। त्यसलाई भने उनले निरन्तरता दिन सकेनन्। सन् २०१४ मा उनले सनसाइन कोस्टमा युवा व्यवसायीको सम्मान पाएका थिए।
त्यसपछि उनी ब्रिसबेन आए। उनको व्यवसाय चलिरहेकै थियो।
सन् २०१६ देखि भने उनको व्यवसाय ओरालो लाग्न थाल्यो।
'समय एकनास नहुने रहेछ। कुनै बेला तीन वटा रेस्टुरेन्ट, एउटै क्याफे, एउटा इटालियन रेस्टुरेन्ट भएको म सन् २०१७ सम्म आइपुग्दा जिरोमा पुगेँ,' होमले भने, 'मैले आफ्नो घर, गाडी सबै बेच्नुपर्यो। सानै उमेरमा पाएको उपलब्धि जोगाउन नसक्दा म झन्डै डिप्रेसनमा पुगेको थिएँ।'
उनले हिम्मत हारेनन्।
सन् २०१५ मै ब्रिसबेनमा सुरू गरेको '८८४८' रेस्टुरेन्ट थियो। त्यसलाई उनले बेच्न खोज्दा बिकेन।
रेस्टुरेन्ट उठाएर लैजाने समेत पैसा थिएन। त्यही रेस्टुरेन्टलाई उनले पछि '८८४८ मःम' भनेर सुरू गरे।
उनका लागि टर्निङ प्वाइन्ट त्यही बन्यो। त्यसपछि उनले फर्केर हेर्नुपरेन।
'ब्रिसबेनको प्राइम ठाउँमा भएकाले मैले त्यहाँ मःमको मात्र २० परिकार बनाउन सुरू गरेँ। सुरूआती समयको जस्तै खटेर काम गरेँ। यसरी चल्यो कि एक वर्षमै सबै ऋण तिरेँ,' उनले भने, '८८४८ मःमको चर्चा हुन थाल्यो। हाम्रोतिर पनि खोल्नुपर्यो भन्दै माग आउन थाल्यो। मैले बिस्तारै फ्रेन्चाइज सुरू गरेँ।'
अहिले ८८४८ मःम त्यहाँ नेपालीहरूका लागि भेट्ने जक्सन जस्तै बनेको होमको भनाइ छ।
ब्रिसबेनको मःम उद्योगमा अहिले ४० जना काम गर्छन्। उनका आफ्ना दुइटा रेस्टुरेन्ट छन् र अस्ट्रेलियाभरि ३८ ठाउँमा फ्रेन्चाइज छन्।
'८८४८ मःमलाई अन्तर्राष्ट्रिय रूपमा चिनाउन केही हदसम्म सफल छु। मैले आमाबुबाको सपना टुटाए पनि अहिले खुसी बनाउन सकेको छु,' होमले भने।
-1746009348.jpg)
