फिनल्याण्डको हेलसिन्कीमा नेपाली स्वास्थ्य तथा प्रविधि क्षेत्रमा कार्यरत पेशेवरहरूको सहभागितामा 'नेपाली डायस्पोरा कनेक्ट–मेडटेक हेलसिन्की २०२६' कार्यक्रम सम्पन्न भएको छ।
कार्यक्रममा स्वास्थ्य क्षेत्रमा प्रविधिको प्रयोग, कृत्रिम बौद्धिकता, डिजिटल स्वास्थ्य सेवा तथा आप्रवासीहरूले स्वास्थ्य प्रणालीमा भोग्ने चुनौतीका विषयमा छलफल गरिएको थियो।
त्यस्तै चिकित्सा र प्रविधि क्षेत्रमा काम गर्ने नेपालीहरूबीच सहकार्य कसरी बढाउन सकिन्छ भन्ने विषयमा पनि सहभागीहरूले आफ्ना अनुभव र सुझाव राखेका थिए।
विकासशील देशहरूमा इलेक्ट्रोनिक मेडिकल रेकर्ड प्रणाली लागु गर्दा देखिने समस्या र सम्भावनाबारे समेत चर्चा भएको थियो।
कार्यक्रमको उद्देश्य नेपाली पेशेवरहरूबीच सम्बन्ध विस्तार गर्नु, ज्ञान आदान–प्रदान गर्नु र स्वास्थ्य क्षेत्रमा नयाँ सोच तथा नवप्रवर्तनलाई प्रोत्साहन गर्नु रहेको आयोजकले बताएका छन्।
कार्यक्रमको समन्वय गोविन्द कँडेलले गरेका थिए।
सहभागीहरूका लागि आयोजक तथा प्रायोजकले निःशुल्क भोजनको व्यवस्था गरेका थिए।
स्वास्थ्य क्षेत्रमा बढ्दो डिजिटल प्रविधि र कृत्रिम बौद्धिकताको प्रयोगका कारण यस्ता कार्यक्रम उपयोगी र सान्दर्भिक भएको सहभागीहरूले बताएका छन्।
