'ब्यान्ड च्याम्पियन रियालिटी शो' आयोजना हुँदै

सेतोपाटी संवाददाता

काठमाडौं, माघ ५

लास्ट फ्राइडे इभेन्ट म्यानेजमेन्टको आयोजनामा सुर, ताल र संगीतको संयोजन ब्यान्ड प्रतिस्पर्धा सुरू भएको छ। यो प्रतिस्पर्धा एपीवान टेलिभिजनबाट ‘ब्यान्ड च्याम्पियन रियालिटी शो’ नामबाट सुरु भएको हो।

देशभर छरिएर रहेका ब्यान्डलाई मञ्च प्रदान गर्न ब्यान्ड च्याम्पियन सुरू गरिएको हो। ब्यान्ड च्याम्पियनको डिजिटल अडिसनमा देशभरका दुई सय ब्यान्डले सहभागिता जनाएका थिए, जसमध्ये ७० वटा ब्यान्ड जज अडिसनका लागि छनोट भएका छन्।

द ब्यान्ड च्याम्पियन रियालिटी शोका निर्देशक फुर्वा शेर्पाले ब्यान्डका सबै सदस्यको उत्तिकै भूमिका रहने भएकाले सबैको प्रस्तुति हेरिने जानकारी दिए। ‘ब्यान्ड च्याम्पियन पावर, प्यासन र पर्फमेन्सको प्रस्तुति हो। यहाँ एक जनाको मात्रै होइन, पूरै समूहकै प्रस्तुति हेरिन्छ,’ निर्देशक शेर्पाले भने, ‘प्रतिस्पर्धामा विशेषगरी रक, पप र आधुनिक मेलोडी गीतहरू प्रस्तुत हुनेछ।’

ब्यान्डको प्रतिस्पर्धा भए पनि स्वर, संगीत र समूहको प्रस्तुति हुनेछ। जज राउन्डपछि ओरिजिनल सङ राउन्ड सुरु हुनेछ। जहाँ ब्यान्डले आफ्नै गीत गाउनुपर्ने हुन्छ। ब्यान्ड च्याम्पियनको जजमा ड्रमर देव राना, भोकलिस्ट रविन तामाङ र गिटारिस्ट ज्योति घिमिरे छन्। नेपाल आइडलकी गोल्डेन माइक विजेता मेगा श्रेष्ठले कार्यक्रम सञ्चालनको रुपमा हुनेछिन्।

एपीवान टेलिभिजनमा शनिबार राती ९ बजे प्रसारण हुने ब्यान्ड च्याम्पियनका विजेताले २० लाख नगद पुरस्कार प्राप्त गर्नेछन्। यसैगरी दोस्रो हुनेले ६ लाख, तेस्रो र चौथोले चार-चार लाख पुरस्कार पाउनेछन्।

विजेता ब्यान्डले विभिन्न सात वटा देशमा प्रस्तुति दिने अवसर समेत पाउने आयोजनक जनाएको छ। ब्यान्ड च्याम्पियनको डिजिटल पार्टनर माउन्ट एभरेस्ट डिजिटल रहेको छ।