कोरोना बीमाको अवधि सकिएको छ। साउन १ देखि संक्रमित हुनेहरुले कोरोना बीमाको रकम नपाउने भएका छन्।
२०७७ वैशाखदेखि लागू गरिएको कोरोना बीमाको अवधि असारपछि स्वतः सकिने व्यवस्था मापदण्डमा उल्लेख भएअनुसार समाप्त भएको बीमक संघले जनाएको छ।
तर असार मसान्तसम्म संक्रमित भएकाले साउनमा पनि आवेदन दिन सक्ने संघका महासचिव चंकी क्षेत्रीले जानकारी दिए। ‘असार मसान्तसम्म संक्रमित भएकाले साउनसम्म आवेदन दिँदा पनि नरोकिने व्यवस्था गरेका छौं’ उनले भने।
बीमा समितिका अनुसार हालसम्म ६० हजार ५८७ बीमितले ५ अर्ब ८५ करोड रुपैयाँ बीमा रकम प्राप्त गरेका छन्। ७ अर्ब ५८ करोड रुपैयाँ निकासीका लागि सरकारसँग आग्रह गरिएको छ। तर अर्थले सो रकम निकासा नदिँदा आवेदन स्वीकृत भइसकेका बीमितले समेत रकम पाउन सकेका छैनन्।
एक अर्ब निर्जीवन बीमा कम्पनीहरूले, एक अर्ब नेपाल पुनर्बीमा कम्पनीले, ५० करोड रूपैयाँ बीमकको महाविपत्ति पुलले, एक अर्ब बीमा समितिले खर्च बेहोरेका छन्।
साढे तीन अर्ब रूपैयाँ यसरी जुटाएर बाँकी रकम नेपाल सरकारले बेहोर्ने गरी मापदण्ड तयार भएको थियो। तर सरकारले समयमै भुक्तानी नदिँदा सर्वसाधारणले दावी भुक्तानी पाउन ढिला भएको छ।
इपिडिमियोलोजी तथा रोग नियन्त्रण महाशाखामा १८ हजार बढी आवेदन स्वीकृतिको पर्खाइमा छन्। त्यस्तै परेकामध्ये ६६६ आवेदन अस्वीकृत भएको समितिले जनाएको छ।
पछिल्लो तथ्यांकअनुसार बीमाको लाभ लिइसकेका र कागजात प्रमाणित भइसकेका गरी कुल ९१ हजार बढी लाभान्वित हुनेछन्। कोरोना बीमाले बीमाबारे सचेतना बढाएको र यसले बीमाको दायर बढेको समितिको ठहर छ।