पूर्वी पहाडी भेगको प्रमुख नगदेबाली अलैंचीको मूल्यमा पछिल्लो समय वृद्धि भएको छ। ताप्लेजुङमा अलैंचीको मूल्य प्रतिमन (४० किलो) रु एक लाख नाघेको छ।
गुणस्तरीय अलैंची प्रतिमन आइतबार एक लाख दुई हजारमा कारोबार भएको अलैंची व्यवसायी संघका जिल्ला अध्यक्ष भद्रवीर रेग्मीले जानकारी दिए। शनिबार प्रतिमन ९६ हजार रहेको अलैंचीको मूल्य अपराह्नपछि प्रतिमन दुई हजारले बढेर ९८ हजार पुगेको थियो। आइतबार फेरि प्रतिमन चार हजारका दरले वृद्धि भई एक लाख दुई हजार पुगेको उनले बताए।
असोज दोस्रो सातासम्म प्रतिमन ८५ हजारमा स्थिर रहेको अलैंचीको मूल्य एक महिनाको अवधिमा १५–१७ हजारले वृद्धि भएको छ। नयाँ उत्पादन सुरु भएपछि ८० हजार प्रतिमनबाट कारोबार सुरु भएको अलैंचीको मूल्यमा यस वर्ष अपेक्षाकृत वृद्धि भएको व्यवसायीहरू बताउँछन्। नेपालमा उत्पादित अलैंची भारतीय बजार हुँदै तेस्रो मुलुक निर्यात हुने गर्दछ।
-1746009348.jpg)
