कात्तिकमा ३ दिन भएको बेमौसमी वर्षाको कारण कृषि क्षेत्रमा तीन अर्ब बढीको क्षति पुगेको छ।
कृषि तथा पशुपन्छी विकास मन्त्रालयको अध्ययन विवरण अनुसार कात्तिक १७ गतेदेखि १९ गतेसम्म परेको बेमौसमी वर्षाका कारण यो क्षति देखिएको हो।
बेमौसमी वर्षाले कोशी, मधेश, बागमती, गण्डकी र लुम्बिनी प्रदेशमा गरी २० हजार १ हेक्टरको धान बालीलाई क्षति पुर्याएको छ।
विवरण अनुसार सबैभन्दा बढी तरकारीमा नोक्सान देखिएको छ। एक अर्ब २५ करोड ७१ लाख रूपैयाँको तरकारीमा क्षति पुगेको छ। ८६ करोड ८२ लाख रूपैयाँको धानमा क्षति छ। ७७ करोड ३० लाखको उखुमा क्षति छ। करिब ५ करोड बराबरको चियामा क्षति छ।
बेमौसमी वर्षको कारण बाली (बीउविजन सहित) करिब ३ अर्ब ५४ करोड ६१ लाख ४ हजार रुपैयाँको आर्थिक क्षति पुर्याएको छ। जसमा मधेश प्रदेशमा सबैभन्दा बढी ३ अर्ब २२ करोड ४७ लाख १९ हजार रुपैयाँको आर्थिक नोक्सानी भएको देखिन्छ।
बालीतर्फ ३ अर्ब ५४ करोड ६१ लाख ४ हजार, पशुपन्छी, मत्स्य तथा घाँस खेती तर्फ १६ करोड १५ लाख ४६ हजार रूपैयाँ बराबरको क्षति छ। कृषि तथा पशुपन्छी पूर्वाधारतर्फ १ करोड ६ लाख २५ हजार रूपैयाँको क्षति छ।
जमिन कटानतर्फ ३ करोड ७१ लाख १७ हजार र विउविजनतर्फ २ करोड ८१ लाख ४ हजार बराबरको क्षति भएको छ।
-1746009348.jpg)
