साउनमा सेयर बजारका दुई कम्पनीको सेयर मूल्य सबैभन्दा धेरै बढ्यो।
यी दुई कम्पनी हुन्, खानीखोला हाइड्रोपावर कम्पनी र सोलु हाइड्रोपावर कम्पनी।
यी दुई कम्पनीको मूल्य बढ्नुको कारण भने फरक फरक छ। वित्तीय अवस्था खासै सुधार नदेखिए पनि एउटाको मूल्य बढिरह्यो भने अर्कोको मूल्य वित्तीय विवरणको सुधारले नै देखियो।
पहिले कुरा गरौं, खानीखोला हाइड्रोपावरको।
खानीखोलाको सेयर २०७३ पुसबाट कारोबारमा आएको हो। यसको सेयर मूल्य साउनमा मात्र ४१.४८ प्रतिशत बढेर ३५२ रूपैयाँ पुग्यो। साउनअघि यो २४९ रूपैयाँमा कारोबार भइरहेको थियो।
साउनमा सबभन्दा धेरै मूल्य बढ्ने कम्पनीमा पहिलो स्थानमा यही रह्यो। यसको मूल्य बढ्नुमा खास कारण भने थिएन।
यसले हालसम्म लाभांश दिएको छैन। गत असोजमा पहिलो पटक एक बराबर एक अनुपातमा हकप्रद सेयर जारी गरेको थियो। बैंक ऋण तिर्न यसले हकप्रद जारी गरेको थियो।
गत आर्थिक वर्ष २०८२–८३ मा खानीखोला दुई करोड ८० लाख रूपैयाँ नोक्सानमा छ। त्यसअघि तीन करोड ४९ लाख रूपैयाँ नोक्सानमा थियो।
२०८१ असोजको बाढीले खानीखोलाका दुवै आयोजनामा क्षति पुगेका कारण आम्दानीमा असर परेको यसले वित्तीय विवरणमा उल्लेख गरेको छ।
२०८२ भदौ अन्त्यबाट ४.३६ मेगावाटको टुंगुन ठोस्ने र दुई मेगावाटको खानीखोला दुवै आयोजना सञ्चालनमा आइसकेको छ। गत आर्थिक वर्षमा भने पहिलो महिना मात्रै आम्दानीमा असर परेको देखिन्छ।
खानीखोला हाइड्रोपावरको आम्दानी १० करोड ७७ लाख रूपैयाँबाट घटेर १० करोड १३ लाख रूपैयाँ भएको छ।
यसको वित्तीय विवरणमा रहेको सञ्चित नोक्सानमा सामान्य सुधार छ। केही वर्षअघि यस्तो नोक्सान ६० करोड रूपैयाँसम्म थियो। अहिले १२ करोड २४ लाख रूपैयाँ छ।
हालै मात्र खानीखोला हाइड्रोपावरको सेयर कारोबारमा दिपेन्द्र अग्रवाल जोडिएका छन्। उनले परिवार र सम्बद्ध व्यक्तिहरूको नामबाट गरेको यही कम्पनीको सेयर कारोबार सम्पन्न भइसकेपछि सिडिएस एन्ड क्लियरिङले रोक्का गरिदिएको छ।
अग्रवालले केही समयदेखि यो कम्पनीको सेयर थुपारिरहेका थिए। तर सेयर किनेर राखेकै कारण उनको कारोबार रोक्का भएको होइन। पहिल्यैदेखि चलिरहेको अनुसन्धान क्रममा उनको बैंक र सेयर खाता रोक्न सम्पत्ति शुद्धीकरणबाट पत्राचार भएको हो।
योसँगै खानीखोलाको सेयर मूल्य घट्न थालेको छ। बिहीबार यसको सेयर मूल्य १७ रूपैयाँ घटेर २७८ रूपैयाँ प्रतिकित्तामा आइपुगेको छ।
यसको प्रतिसेयर नेटवर्थ ८६.८५ रूपैयाँ छ।
सोलु हाइड्रोपावर
सोलु हाइड्रोपावरको सेयर मूल्य साउनमा ३१.८२ प्रतिशत बढ्यो। यसको मूल्य ५०९ रूपैयाँबाट बढेर ६७१ रूपैयाँ पुगेको हो।
अहिले पनि मूल्य बढ्ने क्रम जारी छ। बिहीबार यसको मूल्य करिब १७ रूपैयाँ बढेर ६९९ रूपैयाँ पुगेको छ।
८२ मेगावाटको लोअर सोलु हाइड्रोपावर प्रोजेक्ट सञ्चालन गरिरहेको यसको सेयर कारोबार २०८२ चैतबाट सुरू भएको हो।
कुनै बेला यसको मूल्य ८७५ रूपैयाँसम्म पुगेको थियो।
गत आर्थिक वर्ष २०८२–८३ मा सोलुले एक अर्ब ११ करोड रूपैयाँ नाफा गरेको छ। यसअघि ८३ करोड रूपैयाँ थियो। यसको नाफा ३३.७३ प्रतिशत बढेको हो।
विद्युत बिक्रीबाट भएको आम्दानी दुई अर्ब ११ करोड रूपैयाँबाट बढेर दुई अर्ब ६२ करोड रूपैयाँ पुगेको छ।
सोलुको सञ्चितिमा अहिले तीन अर्ब ८० करोड रूपैयाँ छ। चुक्ता पुँजी १० अर्ब रहेको यस्तो सञ्चिति ३८ प्रतिशत बराबर हो।
यसको प्रतिसेयर आम्दानी ११ रूपैयाँ १४ पैसा छ। प्रतिसेयर नेटवर्थ भने ११० रूपैयाँ छ।
