नेपाल उद्योग वाणिज्य महासंघका नवनिर्वाचित अध्यक्ष शेखर गोल्छाले निर्यातलाई प्रमुख प्राथमिकतामा राखेर महासंघले काम गर्ने बताएका छन्।
आफ्नो नेतृत्वमा निर्वाचित भएर आएका नयाँ पदाधिकारीहरुलाई स्वागत गर्दै उनले आफ्नो नेतृत्वले निर्यातलाई प्राथमिकतामा राख्ने बताएका हुन्।
‘अर्थतन्त्रको प्रमुख इन्जिनको रुपमा निर्यात व्यवसायलाई विकास गर्ने गरी महासंघले आफ्नो भिजन निर्माण गर्न लागेको छ,’ उनले भने।
उनले आगामी दिनमा निर्यातजन्य व्यवसायको लागत, निर्यात प्रोत्साहन, नीतिगत सुधार र व्यवस्थामा आएका समस्यालाई समाधान गर्दै अगाडि बढ्ने बताए।
उद्योग व्यवसायीलाई परेको समस्या समाधान गर्न आफ्नो नेतृत्वमा पक्ष विपक्ष नभइ एकजुट भएर लाग्ने उनले विश्वास व्यक्त गरे।
कार्यक्रममा नवनिर्वाचित वरिष्ठ उपाध्यक्ष चन्द्र प्रसाद ढकालले निर्वाचनपछि महासंघमा पक्ष विपक्ष सकिएको र आफूले निजी क्षेत्रको र उद्योगी व्यवसायीको साख बढाउन कुनै कसुर बाँकी नराख्ने बताए।
‘मैले बैंकको बोनसबाट पाउने रकम भन्दा व्यवसाय धेरै ठूलो छ। त्यसैले बैंकको स्प्रेड दर कम गर्न मेरो पहल हुनेछ,’ वरिष्ठ उपाध्यक्ष ढकालले भने।
उनले निजी क्षेत्रका समस्या पहिचान र निराकरणमा आफूले एक इँटा थप्ने प्रतिबद्धता व्यक्त गरे।
वस्तुगततर्फका उपाध्यक्ष अन्जन श्रेष्ठले अहिले नीतिगत स्पष्टता नभएको भन्दै त्यसले लगानीमा नै असर पार्ने बताए।
उनले आफ्नो पहिलो प्राथमिकता नीतिगत स्पष्टता कायम गराउन सरकारसँग सहकार्य गर्ने र लगानीमैत्री वातावरण बनाउने बताए।
स्वागत कार्यक्रममा जिल्लातर्फका उपाध्यक्ष दिनेश श्रेष्ठले जिल्ला तहमा धेरै समस्या भएको भन्दै त्यसको समाधानको लागि काम गर्ने बताए।
त्यसैगरी एसोशिएट्स तर्फका उपाध्यक्ष रामचन्द्र सांघाईले आफू पनि धागो निर्यातक उद्यमी भएको भन्दै निर्यात वृद्धिको लागि पूर्ण सहयोग गर्ने जानकारी दिए।
निर्यात व्यवसायी महासंघ नेपाल (फिन)ले मंगलबार राजधानीमा एक कार्यक्रमका बीच निर्वाचित नेपाल उद्योग बाणिज्य महासंघका नवनिर्वाचित पदाधिकारीहरुलाई स्वागत तथा सम्मान गरेको छ।
कार्यक्रममा फिनका अध्यक्ष राम बहादुर गुरुङ्गले निर्यातलाई प्रवद्र्धन गर्न व्यवसायिक हित अनुकुल नीति ल्याउन पहल गर्नुपर्ने बताए।
फिनका महासचिव दुर्गा बिक्रम थापाले महासंघको १० वर्षे मार्गचित्र बनाउन सहयोगी भुमिका खेल्न तयार रहेको भन्दै महासंघमा पक्ष÷विपक्षको रुपमा काम गरेमा त्यसको विरोध गर्ने चेतावनी दिए।
यो कार्यकालमा महासंघ एकजुट भएको हेर्न चाहेको भन्दै हालका अध्यक्ष गोल्छाको कामको गतिलाई साथ दिने बताए।
कार्यक्रममा महासंघका नवनिर्वाचित पदाधिकारीलाई फिनले सम्मान गरेको थियो।
-1746009348.jpg)
