रसुवा जिल्लाको भोटेकोशी नदीमा आएको बाढी पीडितको लागि एक्स्ट्रिम इनर्जी ड्रिंक्सले प्रधानमन्त्री दैवीप्रकोप उद्धार कोषमा १ करोड रूपैयाँ सहयोग गर्ने घोषणा गरेको छ।
बुधबार बिहान आएको आकस्मिक बाढीका कारण धेरै जनधनको क्षति भएको छ।
यस दुःखद घडीमा देशका विभिन्न स्थानमा बाढी तथा पहिरोबाट प्रभावित नागरिकहरूको उद्धार, राहत तथा पुनर्स्थापनाका लागि एक्स्ट्रिम इनर्जी ड्रिंक्सले १ करोड रूपैयाँ सहयोगको घोषणा गरेको हो।
कम्पनीले विपद्को यस कठिन घडीमा प्रभावित परिवार तथा नागरिकहरूको पीडा न्यूनीकरण गर्न तथा उद्धार, राहत र पुनर्स्थापनाका कार्यमा सरकारसँग ऐक्यबद्धता जनाउँदै कम्पनीले उक्त सहयोग गर्ने निर्णय गरेको हो।
एक्स्ट्रिम इनर्जी ड्रिंक्सले सम्पूर्ण बाढी–पहिरो प्रभावित नागरिकहरूप्रति गहिरो समवेदना व्यक्त गर्दै विपद्का क्रममा घाइते भएकाहरूको शीघ्र स्वास्थ्य लाभको कामना गर्दै कम्पनीले दिवंगतहरूप्रति हार्दिक श्रद्धाञ्जली अर्पण गरेको छ।
साथै, कम्पनीले विपद्को समयमा आफ्नो ज्यानको जोखिम मोलेर उद्धार तथा राहत कार्यमा निरन्तर खटिएका सुरक्षाकर्मी, स्वास्थ्यकर्मी, स्वयंसेवक, स्थानीय समुदाय तथा सम्बन्धित सरकारी तथा गैरसरकारी निकायहरूको योगदानप्रति एक्स्ट्रिम इनर्जी ड्रिंक्स उच्च सम्मान व्यक्त गर्दछ कम्पनद्वारा जारी विज्ञप्तिमा उल्लेख छ।
कम्पनीले सामाजिक उत्तरदायित्वलाई आफ्नो महत्वपूर्ण प्राथमिकताका रूपमा आत्मसात गर्दै आएको र राष्ट्रलाई आवश्यक परेको हरेक कठिन तथा संकटपूर्ण परिस्थितिमा नागरिक र समुदायको साथमा उभिँदै आएको जनाएको छ।
आगामी दिनमा पनि देश र नागरिकको हितमा आवश्यक सहयोग तथा सहकार्यलाई निरन्तरता दिने प्रतिबद्धता समेत कम्पनीले व्यक्त गरेको छ।
