त्रिशूली–भोटेकोशी बाढी प्रभावित नागरिकलाई सहयोग गर्न चाहनेहरूका लागि डिजिटल भुक्तानी सहज माध्यम बनेको छ।
सरकारले एकद्वार प्रणालीबाट राहत व्यवस्थित गर्न कोष सञ्चालनमा ल्याएसँगै नेपालमा र विदेशमा रहेका नेपाली तथा अन्य सहयोगीले मोबाइलबाटै सरकारको राहत कोषमा रकम पठाउन थालेका छन्।
भुक्तानी सेवा प्रदायक कम्पनीहरूबाट अहिले प्रधानमन्त्री दैवी प्रकोप उद्धार कोषमा रकम बढ्दै गएको छ।
इसेवाका प्रतिनिधि जगदिश खड्काका अनुसार इसेवामार्फत मात्रै अहिलेसम्म १ लाख ८ हजार ८२ जना प्रयोगकर्ताले प्रधानमन्त्री दैवी प्रकोप उद्धार कोषमा रकम जम्मा गरेका छन्।
उनीहरूले ८ करोड २२ लाख रूपैयाँ सहयोग गरेका हुन्।
थोरै (२, ३, ४, ५ सय वा २/४ हजार) जम्मा गर्न चाहने वा सक्ने व्यक्तिले पनि इसेवाको प्लेटफर्म प्रयोग गरेर सरकारमार्फत पीडितलाई सहयोग गरेको देखिन्छ।
फोनपेका अनुसार यसमार्फत हालसम्म २ अर्ब रूपैयाँ सहयोग भएको छ। यो रकम नेपाल भित्रबाट मात्र आएको होइन, विदेशबाट पनि आएको हो।
फोनपेका प्रतिनिधि पारस कुँवरका अनुसार फोनपेमार्फत भारतबाट ३ करोड ४४ लाख रूपैयाँ सहयोग प्राप्त भएको छ।
भारतबाट यो रकम एनपिसिआईसँग एकीकृत भुक्तानी प्रणालीमार्फत आएको हो।
त्यस्तै, चीन तथा दक्षिण–पूर्वी एसियाबाट १ करोड ३५ लाख रुपैयाँ सहयोग प्राप्त भएको छ। यो रकम अलिपेमार्फत आएको हो।
इसेवा वा फोनपे मात्रै होइन, आइएमईखल्ती, प्रभु पे जस्ता भुक्तानी प्रदायक, कनेक्टआईपिएस, बैंकिङ एप तथा अन्य डिजिटल भुक्तानी माध्यम पनि नेपालमा रकम हस्तान्तरणका लागि प्रयोग हुँदै आएका छन्।
यसले राहतका लागि सहयोग गर्न भौगोलिक दूरी बाधक नबनेको देखाउँछ। नेपालमा रहेका व्यक्तिले नेपालबाटै रकम पठाउन सक्छन्।
विदेशमा रहेका व्यक्तिले पनि आफ्नो मोबाइलबाट सहयोग गर्न सहयोग पुगेको देखिएको छ।
डिजिटल भुक्तानीको यो प्रयोग रकम संकलनका लागि मात्रै होइन, मानिसमा रहेको सहयोग गर्ने इच्छालाई व्यवहारमा उतार्न सजिलो बनाएको देखिन्छ।
कुनै विपद्का बेला सहयोग गर्ने इच्छा तत्काल पैदा हुन सक्छ।
तर पैसा पठाउने प्रक्रिया जटिल भएमा त्यो इच्छा योगदानमा परिणत नहुन सक्छ।
डिजिटल भुक्तानीले यही दूरी घटाउन डिजिटल बैंकिङ सहयोगी बनेको भुक्तानी प्रदायकहरू बताउँछन्।
डिजिटल भुक्तानी अब केवल पैसा पठाउने माध्यममा सीमित नरहेको देखिन्छ।
विपद्का बेला सहयोग जुटाउने एउटा सहज माध्यमका रूपमा पनि यसको प्रयोग बढेको छ।
मुख्यतय डिजिटल माध्यमले राहत संकलनका तीनवटा महत्वपूर्ण अवरोध हटाएको छ। समयको बचतका साथै दूरी र प्रक्रियाको झन्जट निकै घटाएको छ।
-1746009348.jpg)
