नेपाल र भारतबीच एकअर्काको देशमा पैसा पठाउन र प्राप्त गर्न सकिने सेवा सुरू भएको छ।
पराष्ट्रमन्त्री शिशिर खनाल र भारतका विदेशमन्त्री एस जयशंकरले संयुक्त रूपमा यस्तो सेवाको सुरूआत गरेका हुन्।
यस अनुसार भारतका बैंकबाट नेपाल र नेपालका बैंकबाट भारतमा रकम पठाउन सकिने भएको छ। तर अहिलेलाई यस्तो सुविधा नेपालमा काम गरिरहेका वा अस्थायी बसोबास गरिरहेका भारतीयहरूले मात्र पाउने छन्।
हाल नेपालका करिब आधा दर्जन बैंकहरूमार्फत् यो सेवाको प्रयोग गर्न सकिने भएको छ। यहाँबाट भारतीयहरूले एक पटकमा १५ हजार भारूसम्म पठाउन सक्ने नेपाल क्यिरिङ हाउस (एनसिएचएल) का प्रमुख कार्यकारी अधिकृत निलेशमान सिंह प्रधानले बताए।
उनका अनुसार नेपालबाट प्रतिमहिना २ लाख भारूसम्म पठाउन पाइनेछ। भारतबाट भने रोजगारीमा रहेका नेपाली वा त्यहीँका बासिन्दाले एक पटकमा दुई लाख भारूसम्म पठाउन सक्नेछन्। दैनिक वा मासिक सीमा तोकिएको छैन।
यसअघिदेखि नै नेपाल भ्रमणमा आउने भारतीयहरूले यहाँ क्युआर मार्फत् भुक्तानी गर्न पाउने सुविधा पाइरहेका छन्। तर नेपालबाट भारत जानेहरूले क्युआर मार्फत् त्यहाँ भुक्तानी गर्न पाइरहेका छैनन्।
भारतको युनिफाइड पेमेन्ट्स इन्टरफेस र नेपालको नेसनल पेमेन्ट इन्टरफेसको प्रणालीबीचको अन्तर आबद्धता मार्फत दुवै मुलुकबीच पैसा पठाउन सकिने भएको हो।
