अर्थमन्त्री स्वर्णिम वाग्लेले सरकारको सुशासन अभियानबाट प्रभावित समूहहरू अहिले भ्रम फैलाउने प्रयासमा लागेको बताएका छन्।
नेपाल उद्योग वाणिज्य महासंघले आयोजना गरेको बजेटपछिको छलफल कार्यक्रममा उनले विगतदेखि कायम रहेको सिन्डिकेट र नीतिगत कब्जाको अभ्यास तोड्न सरकार सफल भएको दाबी गरे।
सरकारले सुशासनका क्षेत्रमा महत्वपूर्ण उपलब्धि हासिल गरेको उल्लेख गर्दै उनले सिन्डिकेट अन्त्य गर्ने र नीति कब्जाको पुरानो अभ्यास तोड्ने काममा धेरै अघि बढिसकिएको बताए।
'यसबाट अतालिएकाहरूले अहिले भ्रम छर्ने काम गरेका छन्। त्यो अन्तिम छटपटी हो जस्तो लागेको छ,' वाग्लेले भने।
उनले अब आर्थिक र व्यावसायिक क्षेत्रमा समान अवसरसहित खुला प्रतिस्पर्धाको वातावरण निर्माण हुने बताए।
नियामक निकायहरूमा स्वच्छ र योग्य व्यक्तिहरूको नियुक्ति हुने व्यवस्था स्थापित गरिने उनको भनाइ थियो।
राजनीतिक संयन्त्र, आर्थिक संरचना र नियामक निकायहरू कुनै व्यक्ति विशेषको नियन्त्रणमा रहने तथा भ्रष्ट राजनीतिज्ञहरूको अवाञ्छित प्रभावमा सञ्चालन हुने अवस्था अन्त्यतर्फ गएको उनले बताए।
अर्थमन्त्री वाग्लेले क्षमता, विचार र सिर्जनशीलता भएका व्यक्तिहरूलाई अवसर प्रदान गर्ने वातावरण निर्माण गर्न सरकार लागेको उल्लेख गरे।
विगतमा विभिन्न अनुमति र लाइसेन्स प्राप्तिका लागि समय खर्चिनुपर्ने अवस्थालाई अन्त्य गर्ने प्रयास भइरहेको उनले बताए।
प्रतिभा र नवप्रवर्तनका आधारमा प्रतिस्पर्धा गर्न सक्ने र उद्यमशीलता प्रशासनिक अवरोधको सट्टा क्षमता र दक्षताले अघि बढ्ने गरी सुधार अघि बढेको उनले बताए।
-ink-1774601888.jpeg)
