प्रहरी र गृह प्रशासनले क्षेत्राधिकार बाहिर गएर भन्सार जाँचपासका सामानमा हस्तक्षेप गरेपछि त्रिभुवन अन्तर्राष्ट्रिय विमानस्थलबाट हुने निकासी रोकिएको व्यवसायीहरूले बताएका छन्।
प्रहरी हस्तक्षेपका कारण १०० टनभन्दा बढी निर्यातयोग्य सामान भन्सार परिसरमै थन्किएको व्यवसायीहरूको आरोप छ।
यस विषयमा बिहीबार सम्बन्धित पक्षसँग छलफल भए पनि कुनै निष्कर्ष ननिस्किएको एक व्यवसायीले जानकारी दिए।
उनीहरूले प्रहरी हस्तक्षेपका कारण भन्सारबाट जाँचपास भएका सामानसमेत बाहिर लैजान समस्या भएको दाबी गरेका छन्। यसले भन्सारका कर्मचारीसमेत दबाबमा पर्ने गरेको उनीहरूको आरोप छ।
व्यवसायीहरूले भन्सारभित्र भण्डारण गर्ने पर्याप्त स्थान नरहेको र वर्षाका कारण सामान भिजेर क्षति भएको गुनासो गरेका छन्।
'भन्सार प्रक्रिया अवरोधले हिजो कार्गो बुकिङ रद्द भयो,' एक निर्यात व्यवसायीले भने, 'अहिलेसम्म एक लाख डलर बराबरको क्षति भइसकेको छ।'
एयरपोर्ट सुरक्षाका प्रतिनिधिले भने व्यवसायीहरूले जाँचपासका लागि आवश्यक पास नलिएको र तोकिएका नियम तथा प्रक्रिया पालना नगरेकाले समस्या उत्पन्न भएको दाबी गरेका छन्।
घटनाबारे भन्सार कार्यालयको आधिकारिक धारणा आउन बाँकी छ।
-1784200444.jpg)
