सरकारले गत आर्थिक वर्षका लागि १४ खर्ब ८० अर्बको राजस्व संकलन हुने लक्ष्यसहित बजेट ल्याएको थियो।
राजस्व उठाउने लक्ष्य तीन पटक फेरवदल गरिए पनि लक्ष्यको अनुपातमा गत वर्ष निकै कम राजस्व संकलन भएको छ।
२०८२ जेठ १५ गते बजेट सार्वजनिक गर्दा तत्कालीन अर्थमन्त्री विष्णु पौडेलले १४ खर्ब ८० अर्ब रूपैयाँको लक्ष्य राखेका थिए। बजेटको अर्धवार्षिक समीक्षामा तत्कालीन अर्थमन्त्री रामेश्वर खनालले १२ खर्ब ९८ अर्ब रूपैयाँसम्म उठ्ने संशोधित लक्ष्य राखेका थिए।
२०८३ जेठ १५ गते हालका अर्थमन्त्री डा. स्वर्णिम वाग्लेले आगामी आर्थिक वर्षको बजेट समीक्षा गर्दा १३ खर्ब २२ करोड ७९ लाख रूपैयाँ राजस्व उठ्ने थप संशोधित लक्ष्य राखेका थिए।
तर यथार्थमा भने १३ खर्ब ४१ अर्ब रूपैयाँ मात्रै राजस्व संकलन भएको छ।
पछिल्लो लक्ष्य जेठ १४ गतेसम्म उठेको राजस्वको आधारमा बाँकी डेढ महिनामा उठ्ने आकलन थियो। यस आधारमा पनि संशोधित लक्ष्यको तुलनामा पनि करिब ६० अर्ब रूपैयाँ कम राजस्व उठेको हो।
विष्णु पौडेलले राखेको लक्ष्य र ६ महिनामा उठेको राजस्व संकलनको तुलनामा रामेश्वर खनालले ८२ अर्ब कम राजस्व संकलन हुने लक्ष्य राखेका थिए।
तर हालका अर्थमन्त्री वाग्लेले खनालको अनुमानको तुलानमा २ अर्ब बढी राजस्व संकलन हुने अनमुान गरेका थिए।
