पछिल्लो आर्थिक वर्ष २०८२/८३ मा ठूला करदाता तथा कारोबारीहरूले दुई खर्ब ४६ अर्ब ७९ करोड बढीको राजस्व उठाएको छ।
यो ठूला करदाताको कर प्रशासन गर्ने निकाय ठूला करदाता कार्यालयलाई दिइएको लक्ष्यको ८१.११ प्रतिशत हो।
वार्षिक एक अर्ब रूपैयाँभन्दा बढीको कारोबार गर्ने करदातालाई ठूला करदाताका रूपमा हेरिन्छ।
यस्ता करदाताको कर प्रशासन ठूला करदाताको कार्यालयले गर्ने गरेको छ।
वार्षिक एक अर्ब रूपैयाँभन्दा बढी कारोबार गर्ने करदाताहरू हाल ५८५ वटा रहेका छन्।
आर्थिक वर्ष २०८१/८२ मा ठूला करदाताबाट दुई खर्ब ३७ अर्ब रूपैयाँको राजस्व उठेको थियो।
यस हिसाबले अहिले ३.७९ प्रतिशले बढी हो। समग्र रूपमा गत आर्थिक वर्षमा ५ प्रतिशतले राजस्व बढे पनि ठूला कारोबारी तथा करदाताबाट उठ्ने राजस्व निकै न्यून देखिएको छ।
ब्याज आम्दानीका साथै आयकरमा आएको कमी र अन्य कर पनि सुधार नहुँदा पछिल्लो आर्थिक वर्षमा ठूला करदाताबाट उठ्ने राजस्वमा कमी आएको कर अधिकारीहरूको भनाइ छ।
केही नियमक निकायको आयमा आएको कमी, दूरसञ्चार क्षेत्रको प्रभाव ठूला करदाताको राजस्वमा परेको कर अधिकारीहरूको भनाइ छ।
ठूला करदाता कार्यालयहरूबाट उठ्ने कर शीर्षकमध्ये सबैभन्दा ठूलो हिस्सा आयकरको छ।
आयकरतर्फ एक खर्ब ४४ अर्ब ९० करोड ९० लाख रूपैयाँ संकलन भएको छ, जुन लक्ष्यको ७७.३९ प्रतिशत हो।
सरकारले ठूला करदाता कार्यालयबाट एक खर्ब ८७ अर्ब आयकर संकलनको लक्ष्य राखेको थियो।
मूल्य अभिवृद्धि करतर्फ ६४ अर्ब ३४ करोड ८६ लाख रूपैयाँ संकलन भएको छ। यो लक्ष्यको ९२.३५ प्रतिशत हो।
घरभाडा आयकरतर्फ ४१ करोड ७७ लाख रूपैयाँ अर्थात् ७८.७४ प्रतिशत लक्ष्य पूरा भएको छ।
ब्याज आयमा लाग्ने करतर्फ भने लक्ष्यको आधा मात्रै राजस्व उठेको छ।
यस शीर्षकमा ४१ अर्ब ३४ करोड ६८ लाख रूपैयाँ उठाउने लक्ष्य रहेकामा २० अर्ब ७५ करोड ३३ लाख रूपैयाँ मात्रै संकलन भएको छ।
यो लक्ष्यको ५०.१९ प्रतिशत हो।
अन्तशुल्क आन्तरिक शीर्षकमा २७ करोड ७७ लाख रूपैयाँ संकलन भएको छ, जुन लक्ष्यको १६२.९० प्रतिशत हो।
शिक्षाकरतर्फ ३९ करोड ३४ लाख रूपैयाँ अर्थात् ८४.४१ प्रतिशत लक्ष्य पूरा भएको छ। अन्य शीर्षकबाट १२ करोड ९ लाख रूपैयाँ राजस्व संकलन भएको छ, जुन लक्ष्यभन्दा धेरै हो।
पछिल्लो ८ वर्षमा ठूला करदाता कार्यालयले संकलन गरेको कर
आर्थिक वर्ष २०७५/७६: १ खर्ब ६२ अर्ब रूपैयाँ
आर्थिक वर्ष २०७६/७७: १ खर्ब ८४ अर्ब रूपैयाँ
आर्थिक वर्ष २०७७/७८: १ खर्ब ६९ अर्ब रूपैयाँ
आर्थिक वर्ष २०७८/७९: १ खर्ब ८३ अर्ब रूपैयाँ
आर्थिक वर्ष २०७९/८०: १ खर्ब ८५ अर्ब रूपैयाँ
आर्थिक वर्ष २०८०/८१: २ खर्ब १७ अर्ब रूपैयाँ
आर्थिक वर्ष २०८१/८२: २ खर्ब ३७ अर्ब रूपैयाँ
आर्थिक वर्ष २०८२/८३: २ खर्ब ४६ अर्ब रूपैयाँ
असार महिनामा मात्रै ठूला करदाताको कार्यालयले ३९ अर्ब ५४ करोड राजस्वसंकलन गरेको छ।
यो पनि लक्ष्यको तुलनामा ८१ प्रतिशत नै हो।
यो कार्यालयले असार महिनामा ४८ अर्ब ३७ करोड राजस्व उठाउने लक्ष्य राखेको थियो।
