सामाजिक सुरक्षा कोषमा कूल एक खर्ब १६ अर्ब ७१ करोड ८९ लाख ५० हजार ५२५ रूपैयाँ बराबरको योगदान रकम जम्मा भएको छ।
आर्थिक वर्ष २०८२/८३ को असार मसान्तसम्म उक्त योगदान रकम जम्मा भएको हो। सूचीकृत रोजगारदाता र सूचीकृत योगदानकर्ताले उक्त रकम जम्मा गरेका हुन्।
कोषका अनुसार सूचीकृत रोजगारदाताको संख्या २३ हजार ४९० पुगेको छ। सूचीकृत योगदानकर्ताको संख्या ३० लाख ४३ हजार २०० पुगेको छ। कोषले २१ अर्ब २७ करोड एक लाख २० हजार २५२ रुपैयाँ बराबरको दाबी भुक्तानी गरेको छ।
यस्तै, औषधि उपचार, स्वास्थ्य तथा मातृत्व दाबीतर्फ तीन अर्ब ५२ करोड पाँच लाख ४७ हजार ४६२ रूपैयाँ उपलब्ध गराएको छ।
दुर्घटना तथा अशक्तता सुरक्षा दाबीतर्फ ३० करोड ४६ लाख ६ हजार ५१४ रूपैयाँ, आश्रित परिवार सुरक्षा दाबीतर्फ ३८ करोड चार लाख २५ हजार २१६ रूपैयाँ र अवकाश दाबीतर्फ १७ अर्ब छ करोड ४५ लाख ४१ हजार ६१ रूपैयाँ बराबर रकम उपलब्ध गराएको छ। पछिल्लो पटक वैदेशिक रोजगारीमा जाने श्रमिकलाई समेत कोषमा समेटिएपछि योगदान रकम वृद्धि भएको छ।
पेन्सन, औषधि उपचार तथा अन्य सामाजिक सुरक्षाका कार्यक्रमसमेत अगाडि बढाइएकाले कोषप्रति आम मानिसको चासो बढ्दै गएको पाइएको छ। कोषले विभिन्न उत्पादनमूलक क्षेत्रमा लगानी सुरु गरेको छ। यसबाट बहुआयामिक लाभ हासिल हुने विश्वास लिइएको छ।
-रासस
