अर्थमन्त्री डा.स्वर्णिम वाग्लेको निर्देशनपछि भन्सार विभाग मातहतका २७२ जना अधिकृत र नायब सुब्बाको सरूवा रद्द भएको छ।
भन्सार विभागले गत कात्तिक २० गते ६९ जना अधिकृत र २०३ जना नायब सुब्बाको विभागअन्तर्गतका कार्यालयहरूमा सरूवा गरेको थियो।
तर, सरूवा पारदर्शी नभएको भन्दै उजुरी परेपछि अर्थमन्त्री डा.वाग्लेले सबै तहको सरूवा रद्द गर्न सोमबार निर्देशन दिएका हुन्।
‘सरूवा पारदर्शी र न्यायोचित नभएको भन्ने गम्भीर सूचना र उजुरी प्राप्त भएका कारण तत्काल उक्त सरूवा निर्णय रद्द गर्नू,’ अर्थमन्त्रीले मन्त्रालय र विभागको नेतृत्वलाई भनेका छन्, ‘पारदर्शी र प्रविधिमैत्री प्रणाली विकास गरेर नयाँ विधिबाट सरूवा गर्नू।’
अर्थमन्त्रीको निर्देशनपछि सोमबार नै निमित्त अर्थसचिव डा.सुमन दाहालले सरूवा निर्णय रद्द गर्न भन्सार विभागलाई लिखित पत्राचार गरेको बताइएको छ।
त्यसपछि भन्सार विभागले सरूवा रद्द गरेको छ।
मन्त्रालयको लिखित निर्देशनपछि कात्तिक २० गते सरूवा भएका ६९ जना अधिकृत र २०३ जना नायब सुब्बाको सरूवा रद्द भएको भन्सार विभागले जनाएको छ।
अब मन्त्रालयले विकास गर्ने प्रविधिमैत्री प्रणालीमा टेकेर मापदण्डका आधारमा विभागले नयाँ सरूवा गर्ने भन्सार विभागको भनाइ छ।
साथै, सरूवाका सन्दर्भमा छानबिन गर्न पनि अर्थमन्त्री डा.वाग्लेले मन्त्रालयका उच्च अधिकारीहरूलाई निर्देशन दिएका छन्।