गुगलको नयाँ नीतिले धेरै नेपाली प्रयोगकर्तालाई टिभीमा युट्युब हेर्न असर पर्न सक्ने भएको छ।
गुगलले अब अनसर्टिफाइड एन्ड्रोइड ओपन सोर्स प्रोजेक्ट (एओएसपी) सेट टप बक्सहरूमा युट्युब चल्न नदिने घोषणा गरेको छ।
केही समयअघि गुगलले यस्तो घोषणा गरेको हो।
गुगलले भनेको छ, 'प्रमाणीकरण नभएका केही एओएसपी उपकरणहरूमा युट्युब उपलब्ध रहेको कुरा हालै हाम्रो जानकारीमा आएको छ र चाँडै नै यस्ता उपकरणहरूमा युट्युब पहुँच रोक्ने प्रक्रिया सुरू गर्नेछौँ।'
प्रयोगकर्ताको खराब अनुभव, सम्भावित सुरक्षा जोखिम, तथा युट्युब प्रयोग गर्न आवश्यक प्राविधिक मापदण्डहरू यस्ता उपकरणहरूले पूरा नगरेको कारण यो निर्णय लिनुपरेको युट्युबले उल्लेख गरेको छ।
अहिलेपनि धेरै इन्टरनेट सेवा प्रदायकले यस्ता सर्टिफाइड नभएका सेट टप बक्सको प्रयोग गरिरहेकाले त्यसमा समस्या आउन सक्ने देखिएको छ।
इन्टरनेट सेवा प्रदायक संघका अध्यक्ष सुधिर पराजुली भन्छन्,'अहिले कतिपयले गुगलले नै डेभलपरहरूको लागि दिएको अनसर्टिफाइड एएसपिएस भर्सनबाट ग्राहकलाई टिभीमा युट्युब हेर्ने सुविधा दिइरहेका थिए, त्यस्तोमा अब नचल्ने हुनसक्छ।'
धेरै घरेलु टिभी ब्रान्डहरूले पनि अनसर्टिफाइड एन्ड्रोइड स्मार्ट टिभी बिक्री गर्दै आएका छन्।
यसले गर्दा धेरै नेपाली घरपरिवारले नियमित रूपमा प्रयोग गर्दै आएको युट्युब सेवामा तुरुन्तै असर पर्ने जोखिम बढेको छ।
अहिले क्रमिक रूपमा गुगलले यस्ता अनसर्टिफाइड उपकरणमा युट्युब बन्द गरिरहेकोले नेपालमा पनि यसको असर पर्न सक्छ।
अवरोधरहित युट्युब हेर्नका लागि नेपाली प्रयोगकर्ताले गुगल सर्टिफाइड टिभी सेट–टप–बक्स वा सर्टिफाइड स्मार्ट टिभीमा अपग्रेड गर्नुपर्ने हुनसक्छ।
तर, पछिल्लो समय गुगल कै सर्टिफाइड सेट टप बक्सको मूल्य समेत पहिलेभन्दा सस्तिएकाले सेवा प्रदायकहरूलाई यस्ता सेटटप बक्स परिवर्तन गर्न समस्या नरहेको पराजुली बताउँछन्।
-1746009348.jpg)
