पछिल्लो एक वर्षमा अन्तर्राष्ट्रिय बजारमा सुनको मूल्य तीव्र रूपमा बढेको छ।
राष्ट्र बैंकको मासिक प्रतिवेदनअनुसार २०८२ कात्तिक मसान्तमा सुनको मूल्य अघिल्लो वर्षको सोही अवधिको तुलनामा ५८.३ प्रतिशतले बढेको हो।
अन्तर्राष्ट्रिय बजारमा २०८१ कात्तिक मसान्तमा प्रति आउन्स सुनको मूल्य २५ सय ७१.८० अमेरिकी डलर रहेकोमा २०८२ कात्तिक मसान्तमा बढेर ४ हजार ७१.१० अमेरिकी डलर पुगेको छ। सुनको मूल्यमा आएको यो वृद्धिले अन्तर्राष्ट्रिय बजारमा बहुमूल्य धातुप्रतिको माग बढेको संकेत देखाएको छ।
यसै अवधिमा कच्चा पेट्रोलियमको मूल्य भने घटेको छ।
२०८१ कात्तिक मसान्तमा प्रति ब्यारल ७३.४५ अमेरिकी डलर रहेको कच्चा पेट्रोलियमको मूल्य २०८२ कात्तिक मसान्तमा १३.६ प्रतिशतले घटेर ६३.४५ अमेरिकी डलर कायम भएको छ।
विनिमय दरतर्फ हेर्दा २०८२ असार मसान्तको तुलनामा २०८२ कात्तिक मसान्तमा अमेरिकी डलरसँग नेपाली रूपैयाँ ३.३ प्रतिशतले अवमूल्यन भएको छ। अघिल्लो वर्षको सोही अवधिमा नेपाली रूपैयाँ १.० प्रतिशतले अवमूल्यन भएको थियो।
२०८२ कात्तिक मसान्तमा अमेरिकी डलर एकको खरिद विनिमयदर १४१.७० रूपैयाँ पुगेको छ। २०८२ असार मसान्तमा उक्त विनिमयदर १३७ रूपैयाँ रहेको राष्ट्र बैंकको प्रतिवेदनमा उल्लेख छ।
-1746009348.jpg)
