स्वतन्त्र ऊर्जा उत्पादकहरूको संस्था, नेपाल (इप्पान) ले नयाँ अन्तरिक सरकारसँग ऊर्जा क्षेत्रमा सहकार्य र सहयात्रा गर्ने जनाएको छ।
जेन–जी युवाहरूको आन्दोलनपछि अन्तरिम सरकारमा नियुक्त भएकी सुशीला कार्कीलाई बधाई ज्ञापन गर्दै इप्पानले सहकार्य गर्ने जनाएको हो।
प्रधान न्यायाधीशनको जिम्मेवारी पूरा गरिसकेकी कार्की नेपालको इतिहासमै पहिलो महिला प्रधानमन्त्रीको रूपमा नियुक्त भएकोमा इप्पानले खुसी व्यक्त गरेको छ।
यस्तै, हरेक क्षेत्रको लागि अत्यावश्यक मानिएको ऊर्जा क्षेत्रमार्फत् मुलुकको समृद्धि हासिल गर्न सकिने इप्पानले बताएको छ।
उच्च मनोबलमा साथ विभिन्न समस्या र चुनौतीहरूबीच लगानी गरिरहेका ऊर्जा उद्यमीहरूको लागि कार्कीको कार्यकाल स्वर्णिम हुने अपेक्षा इप्पानले गरेको छ।
इप्पानका अध्यक्ष गणेश कार्कीले परिवर्तित अवस्थामा नयाँ अन्तरिम सरकारले लगानीमैत्री वातावरण निर्माणमार्फत् निजी क्षेत्रलाई उत्साहित बनाउने कार्य गर्ने अपेक्षा राखेको बताए।
‘हामी नयाँ अन्तरिक सरकारले लगानीमैत्री वातावरण बनाउने अपेक्षा गरेको छौं। अहिलेको अवस्थामा देशको पुनः निर्माणसँगै आर्थिक समृद्धिको यात्रामा बढीभन्दा बढी लगानीमार्फत् नेपाल सरकारसँगै सहकार्य र सहयात्रा गर्न तयार छौं,’ उनले भने।
अध्यक्ष कार्कीले नयाँ अन्तरिम सरकारले ऊर्जा उद्यमीहरूले ऊर्जा विकास र विस्तारका लागि हाल भोगिरेहको समस्या र चुनौतीहरू समाधानका लागि अग्रसर हुने अपेक्षा गरेको बताउँदै ऊर्जा सुरक्षाका लागि निजी क्षेत्रले योगदान दिइरहेको र आगामी दिनमा अझ बढी दिनका लागि तयार रहेको बताए।
-1746009348.jpg)
