पछिल्लो समय नेपालमा वाटर स्पोर्टस् पार्क ग्राहकहरूको नियमित मनोरञ्जनको केन्द्र बन्न थालेको छ। यही अवस्थालाई मध्यनजर गर्दै पोखरामा ५० करोड लगानीमा अन्तर्राष्ट्रिय स्तरको फिस्टेल ड्रिमपार्क सञ्चालनमा आएको छ।
फिस्टेल ड्रिम पार्क मानिसहरू रमाइलो गर्न आउने केन्द्रका रूपमा निर्माण गरिएको सञ्चालक भरत गौतम बताउँछन्। 'यसअघि पोखरामा यो स्तरको पार्कहरू बनेका छैनन्। कुनै पनि व्यक्ति वा परिवार यहाँ आएर पुरै दिन बिताएर रमाइलो गर्न सक्ने प्रकारको इभेन्ट्सहरू हामीसँग उपलब्ध छन्,' गौतमले भने।
इन्डोर गेम, ड्राई पार्क, वेट पार्क, सोफा स्लाइड, लेजी रिभर, फ्रि-फल, ट्रोनाडो बावल, वेभ पुल, रेल लगायतका करिब २५ थरीका गतिविधिमा रमाउन सकिने गौतमले जानकारी दिए।
पार्कको प्रवेश शुल्क प्रति व्यक्ति दुई सय रुपैयाँ छ। बच्चाहरूका लागि ५० प्रतिशत छुटको व्यवस्था छ। यस्तै, वाटर पार्कको प्याकेज एक हजार दुई सय रुपैयाँ र ड्राइपार्क प्याकेज ४५० रुपैयाँमा उपलब्ध छन्। प्रवेशपछि सिमित खेल खेल्न चाहनेका लागि प्रति खेलको एक सय ५० रुपैयाँदेखि तीन सय रुपैयाँसम्म लाग्ने कम्पनीले बताएको छ।
पानीमा खेलिने वा भनौं गर्मीमा खेलिने खेलहरू मात्र नभइ पानी नचाहिने खेलहरू पनि पार्कमा राखिएका छन्। जुनसुकै मौसममा पनि मानिसहरू आएर रमाइलो गर्न सकिने गरी व्यवस्था मिलाउने क्रममा एकै ठाउँमा वाटर र ड्राइ पार्कको परिकल्पना गरिएको ल्याइएको गौतम बताउँछन्।
'कतिपय यस्ता पार्कहरू छ महिना खुल्ने र छ महिना बन्द हुने हुन्छ। त्यस्तो नहोस् भनेर हामीले बच्चाहरूका लागि छुट्टै इन्डोर गेमहरू राखेका हौं,' गौतम थप्छन्, 'यस पार्कमा जडान गरिएको प्रविधि एवम् सामाग्री भारत र चीनबाट ल्याइएको हो। ग्राहकको सुरक्षाका लागि हामीले विशेष ध्यान दिएरै क्वालिटी प्रोडक्टहरू जडान गरेका छौं।'
उनका अनुसार ६५ रोपनी जग्गामा फैलिएको पार्कमा विभिन्न खेलहरू गरेर पाँच हजार मानिसहरू एकै पटक रमाउन सक्छन्। पार्कमा करिब सय जनाले प्रत्यक्ष रोजगारी पाएका छन्।
पार्क पोखराको पुरानो एयरपोर्टबाट करिब चार किलोमिटर र पृथ्वीचोकबाट करिब पाँच किलोमिटरको दूरीमा छ। पार्कमा जान निजी मात्र नभई एयरपोर्टबाट ढुंगेसाहु, सितापाइला जाने सार्वजनिक यातायातबाट पनि पुग्न सकिन्छ। पार्कमा हिरा केसी, नारायण खरेल, कमल बस्नेत, भरत गौतम, कदम केसी, सुशिल खरेल, नारायण पौडेल, जितेन्द्र केसी, अर्जुन खरेल, मदन कुमार श्रेष्ठ, भिम केसी लगायत १३ जनाको लगानी छ।
