भदौ २४ को घटनामा केही ठूला होटल समेत आगजनी र तोडफोडको सिकार भएपछि त्यसको सिधा असर पर्यटन क्षेत्रमा पर्छ भन्ने धेरैको डर थियो।
यस्ता विध्वंशात्मक घटनाले अन्तर्राष्ट्रिय जगतमा नकारात्मक प्रचार हुने र नेपाल आउन चाहने पर्यटकले आफ्नो मन बदल्ने सक्ने कतिपयको शंका थियो।
घटनालगत्तै कतिपय होटलको बुकिङ रद्द हुनुले पनि शंका बढाइदिएको थियो।
तर यो वर्षको नयाँ पर्यटकीय सिजन सुरू भएसँगै व्यवसायीहरू उत्साहित हुन थालेका छन्। खासगरी पदयात्राका प्रमुख गन्तव्यहरूमा स्वदेशी तथा विदेशी पर्यटकको घुइँचोले व्यवसायीहरूको उत्साह बढाएको छ।
अन्नपूर्ण सर्किट, लाङटाङ लगायतका प्रमुख पदयात्रा रूटमा चहलपहल बढेको देखिन्छ। ती गन्तव्यका होटलको अकुपेन्सी पनि बढेको छ।
होटल संघ पोखराले तिहार अघिदेखि पोखरामा पर्यटक चहलपहल बढेको र होटल अकुपेन्सी ५० प्रतिशत पुगेको जनाएको छ।
'विभिन्न गन्तव्यमा ट्रेकिङ जाने र फर्कनेहरू पोखरामा बस्ने भएकाले होटल अकुपेन्सी बढेको छ,' संघका अध्यक्ष लक्ष्मण सुवेदीले सेतोपाटीसँग भने, 'अहिले अधिकांश होटलमा लगभग ५० प्रतिशत अकुपेन्सी छ। यसमा थोरै विदेशी र धेरै स्वदेशी पर्यटक छन्।'
नेपालमा सेप्टेम्बर, अक्टोबर र नोभेम्बर महिनालाई पर्यटकीय सिजन मानिन्छ। पर्यटकहरू यो बेला पर्वतारोहण, पदयात्रा, तीर्थयात्रा, साहसिक यात्रा लगायतका गतिविधिमा रमाउन नेपाल आउँछन्।
अघिल्ला वर्ष यति बेला देशभर ८० देखि ९० प्रतिशतसम्म होटल अकुपेन्सी हुन्थ्यो। जेन-जी आन्दोलनका कारण अपेक्षाअनुसार विदेशी पर्यटक नआएको पर्यटन व्यवसायीहरू बताउँछन्।
'यति ठूलो घटना भएपछि जति पर्यटक आएका छन्, त्यसलाई पनि सन्तोषजनक मान्नुपर्छ,' अध्यक्ष सुवेदीले भने।
खासगरी अमेरिका, क्यानडा, बेल्जियम लगायत देशले नेपाल घुम्न जान असुरक्षित छ भनेर ट्राभल एड्भाइजरी जारी गरेका छन्। यसलाई हटाउन सरकारले कूटनीतिक पहल गर्न सके पर्यटक आगमन बढ्ने व्यवसायीहरू बताउँछन्।
'एड्भाइजरी हटाइएको अवस्थामा नेपालको पर्यटन क्षेत्र पुरानै लयमा फर्किने छ,' होटल संघ नेपालका अध्यक्ष विनायक शाहले भने, 'यसले थप सकारात्मक सन्देश प्रवाह गर्नेछ।'
पर्यटन विभागको तथ्यांक हेर्ने हो भने यो सिजनमा हिमाल आरोहणमा आउनेको संख्या उत्साहजनक नै देखिन्छ।
यस वर्ष शरद ऋतुमा गत वर्षभन्दा बढी आरोही आएको विभागका निर्देशक हिमाल गौतमले जानकारी दिए। उनका अनुसार हालसम्म ७६ देशका १ हजार विदेशी आरोहीले ४९ वटा हिमाल आरोहणका लागि अनुमति लिएका छन्। यसबाट करिब २३ करोड रूपैयाँ राजस्व संकलन भइसकेको छ।
यसबीच पर्यटन क्षेत्रसँग सम्बन्धित सबै सरोकारवालाहरू पर्यटक आगमन बढाउन छलफलमा पनि जुटिरहेका छन्। उनीहरूले विभिन्न अभियान चलाएर अन्तर्राष्ट्रिय पर्यटकका लागि नेपाल सुरक्षित छ भन्ने सन्देश दिइरहेका छन्।
अन्तर्राष्ट्रिय संघ-सस्थाहरूसँग दैनिकजसो नेपालको अवस्थाबारे कुराकानी भइरहेको पर्यटन बोर्डका सिइओ दिपकराज जोशी बताउँछन्।
उनका अनुसार विभिन्न मुलुकले यति बेला आफ्ना नागरिकलाई नेपाल भ्रमणमा पठाउन यहाँको शान्ति सुरक्षाबारे सोधिरहेका छन्।
यसका लागि बोर्डले 'नेपाल नाउ' अभियानमार्फत पर्यटन क्षेत्र पुनरूत्थानको प्रयास गरेको छ। यो अभियानअन्तर्गत नेपाल घुमफिर गरिरहेका पर्यटकले आफ्नो अनुभव सुनाउँदै सामाजिक सञ्जालमा सेयर गरिरहेका छन्।
'हामीले नेपाल सुरक्षित छ है भन्ने मेसेज दिइरहेका छौं,' उनले भने, 'डिसेम्बर पछिका लागि पर्यटकको सोधपुछ सकरात्मक देखिएको छ।'
राजनीतिक गतिविधिले थप असर नपुर्याए केही महिनामै पर्यटक आगमन बढ्नेमा व्यवसायीहरू आशावादी छन्।
आन्दोलनपछि 'माइस टुरिजम' मा असर देखिएको नेपाल एसोसिएसन अफ टुर एन्ड ट्राभल (नाट्टा) का अध्यक्ष कुमारमणि थपलियाले बताए।
माइस टुरिजम भनेको मनोरञ्जनभन्दा बढी व्यवसाय, ज्ञान, नेटवर्किङ लगायत उद्देश्यले हुने यात्रा (मिटिङ, कन्फ्रेन्स, एक्जिवेसन) हो।
उता होटल संघ भैरहवाले भने भारतीय पर्यटक आगमन कम भएपछि भैरहवा तथा लुम्बिनीमा असर परेको जनाएको छ। होटल संघ भैरहवाका अध्यक्ष सिपी श्रेष्ठका अनुसार आन्दोलनपछि भैरहवाको होटल बुकिङ करिब ९० प्रतिशत रद्द भएको छ। भारतीय पर्यटकमा निर्भर भैरहवामा आन्दोलनपछि नकारात्मक समाचार फैलिँदा बुकिङ घटेको उनले बताए।
***
-1746009348.jpg)
