नेकपा एमालेका महासचिव शंकर पोखरेलले गत मंसिर ४ गते सम्पन्न प्रतिनिधि तथा प्रदेश सभा सदस्य निर्वाचनको परिणाम सोचेजस्तो नआए पनि पार्टीको लोकप्रियता कायमै भएको बताएका छन्।
मंगलबार कर्णाली प्रदेशको वीरेन्द्रनगरमा आयोजित संगठन सुदृढीकरण तथा विस्तार (मिसन ग्रासरूट) अभियानअन्तर्गत बृहत कार्यकर्ता भेलामा उनले गठबन्धन शक्तिसँगको चुनाव प्रतिस्पर्धामा एमालेले आफ्नो जनमत कमजोर नभएको पुष्टि गरेको जिकिर गरे।
आफूलाई ठूला दल भन्नेले एकल तरिकाले चुनाव लडेको भए एमाले पहिलो पार्टी हुने उनले दाबी गरे।
उनले भने, 'हामी एमालेलाई देशकै पहिलो पार्टी बनाएर राजनीतिमा स्थायित्व दिन दुईमहिने मिसन ग्रासरूट अभियान सञ्चालन गरेको हौं। यसले मुलुकमा उत्साह र उमंग ल्याएको छ।'
एमालेका उपाध्यक्ष सुवास नेम्वाङले जनताका सरोकारका विषयलाई केन्द्रविन्दुमा राखेर पार्टी बलियो र पहिलो बनाउने अभियानमा लागिएको बताए।
'हामी एमालेलाई पहिलो राष्ट्रिय शक्तिका रूपमा स्थापित गर्दैछौं। अहिले हामीलाई सरकारका जाने कुनै चासो छैन,' उनले भने, 'हाम्रो लक्ष्य र उद्देश्य भनेकै समृद्ध नेपाल, सुखी नेपाली जनताको राष्ट्रिय आकांक्षा पूरा गर्नु हो।'
राजनीतिक स्थायित्व कायम गर्न मुलुकमा बलियो पार्टी बन्ने अभियानको यात्रामा एमाले लागेको उपाध्यक्ष नेम्वाङको भनाइ थियो।
उक्त भेलामा उपमहासचिव विष्णु रिमाल, सचिव योगेश भट्टराई, स्थायी कमिटी सदस्य यामलाल कँडेल, गोरखबहादुर बोगटी, विन्दा पाण्डे र शिवमाया तुम्बाहाम्फेसहित प्रदेश तथा जिल्लास्तरका नेताको सहभागिता थियो।
-1746009348.jpg)
