सांसद अमरेशकुमार सिंहले नागरिकताको सवाल गरिब जनताका छोराछोरीको समस्याको सवाल भएका कारण संसदबाट पास नभएको बताएका छन्।
मंगलबार प्रतिनिधि सभा बैठकमा बोल्दै सांसद सिंहले प्रधानमन्त्री वा पूर्वप्रधानमन्त्रीका छोराछोरीको सवाल भएको भए नागरिकता विधेयक पहिल्यै पास हुने दाबी गरे।
उनले गरिब जनताका छोराछोरीले नागरिकता नपाउँदा विभिन सास्ती भोग्नुपरेको तर बारम्बार परिवर्तन हुने सरकारले नागरिकताको विषयलाई लोकप्रियताको हतियार बनाएको आरोप लगाए।
हरेक सरकार र तिनका प्रमुखहरूले बाहिरबाहिर नागरिकताको समस्या समाधान गर्ने आश्वासन दिएपनि भित्र भित्रै रोक्नका लागि उनीहरूकै संलग्नता हुने सिंहले बताए।
आफू यसअघि राज्यव्यवस्था समितिको सदस्य हुँदा त्यस्ता प्रवृत्तिहरू प्रत्यक्ष रूपमा देखेको बताए।
‘त्यतिबेलको सत्ताले जानीजानी नागरिकता विधेयक पास गर्न दिएन । उनीहरूकै सांसद र सदस्यहरूले नागरिकता विधेयकलाई अलमलाई राखे,’ सिंहले भने।
नागरिकताको समस्या गरिब र एउटा समूदायको समस्या भएको र त्यो समूदाय सत्तामा नभएका कारण पनि समाधान नभएको बताए।
‘एउटै समूदायले देश चलाउन खोज्दा दुर्घटनातिर जाँदैछ। देश दुर्घटनामा गयो भने त्यसको जिम्मेवार चारपाँच जना पूर्वप्रधानमन्त्री हुनेछन्,’ नेता सिंहले भने।
