काठमाडौंको ऐतिहासिक धरहराको पूर्वतर्फ केही दिनदेखि गुलाबी रङको रिबन फर्फराइरहेको छ।
धरहरामा सजाइएको यो रिबन केवल सजावटका लागि होइन, स्तन क्यान्सरविरूद्ध जनचेतना फैलाउने प्रतीक हो।
अक्टोबर १० मा रक्षा क्यान्सर केयर सोसाइटीले स्तन क्यान्सर सचेतना महिनाका अवसरमा धरहरालाई गुलाबी रङले सजाएको हो। त्यसै अवसरमा संस्थाले काठमाडौंमा सचेतना र्यालीसमेत आयोजना गरेको थियो।
भृकुटीमण्डपबाट सुरू भएको र्यालीमा विभिन्न संघसंस्थाका करिब ७०० जनाको सहभागिता थियो। र्याली वसन्तपुर दरबार क्षेत्रमा पुगेर समापन भएको थियो।
विश्वभर अक्टोबर महिनालाई 'पिंक अक्टोबर' अर्थात् स्तन क्यान्सर सचेतना महिनाका रूपमा मनाइन्छ। यस अवधिमा गुलाबी रिबनलाई स्तन क्यान्सरसम्बन्धी जनचेतना फैलाउने प्रतीकका रूपमा प्रयोग गरिन्छ।
यसको उद्देश्य स्तन क्यान्सरबारे खुलेर कुरा गर्न प्रोत्साहित गर्नु, समयमै स्वास्थ्य परीक्षण गराउन प्रेरित गर्नु र यस रोगबाट प्रभावित व्यक्तिहरूप्रति ऐक्यबद्धता जनाउनु हो।
विश्व स्वास्थ्य संगठनका अनुसार सन् २०२४ मा विश्वभर अनुमानित २४ लाख महिलामा स्तन क्यान्सर देखिएको थियो। समयमै रोग पहिचान गर्न सके उपचार प्रभावकारी हुने सम्भावना बढ्छ।
त्यसैले स्तनमा असामान्य परिवर्तन देखिए स्वास्थ्यकर्मीसँग परामर्श लिनु र आवश्यक परीक्षण गराउनु महत्त्वपूर्ण हुन्छ।
धरहरामा फर्फराइरहेको गुलाबी रिबनले पनि यही सन्देश दिइरहेको छ — स्तन क्यान्सरबारे सचेत बनौं, समयमै परीक्षण गरौं र जीवन बचाऔं।
.JPG)
-1746513231.jpg)
