नेकपा एमालेका अध्यक्ष केपी शर्मा ओलीले पाँच पटक प्रधानमन्त्री भएर पनि कांग्रेस सभापति शेरबहादुर देउवाले एउटा काम पनि गर्न नसकेको टिप्पणी गरेका छन्।
बिहीबार बारामा आयोजित चुनावी सभामा बोल्दै ओलीले कांग्रेस सभापति देउवालाई संसदमै कामबारे प्रश्न गरे पनि एउटा काम पनि बताउन नसकेको दाबी गरे।
मैले रोष्टममा उभिएर देउवाजीलाई प्रश्न गरेको छु,' उनले भने, 'शेरबहादुरजी पाँच पटक प्रधानमन्त्री हुनुभयो। तपाईंले के काम गर्नुभयो? यो प्रतिनिधि सभालाई भन्नुस् भनें। उहाँले अहिलेसम्म बताउन सक्नुभएको छैन।'
यस्तै ओलीले आफू प्रधानमन्त्री हुँदा सय वटा भन्दा बढी राम्रो काम गरेको दाबी गरे।
'तपाईंले मलाई आफू बसेको ठाउँबाट सोध्नुहोस्। म सय वटा ठूला ठूला गरेका काम तत्काल बताउन सक्छु', उनले भने, 'म मधेसमा आएर जनतालाई आएर भन्न सक्छु जनता आवास कार्यक्रम अन्तरगत घर बनाएर जनतालाई दिएका छौं।'
त्यस्तै माओवादी केन्द्रका अध्यक्ष पुष्पकमल दाहाल (प्रचण्ड) ले जनतालाई चोट मात्र दिएको बताए।
प्रचण्डले जनतालाई घाइते, अपाङ्ग र शहिद बनाइदिएको ओलीले बताए।
ओलीले अन्य पूर्व प्रधानमन्त्रीहरूले वीरगञ्ज कारखना, चिनी कारखाना लगायत कारखाना बन्द गराउने काम गरेको आरोप लगाए।
दश दलीय गठबन्धन सरकार म्यादी सरकार भएका कारण आफैं ढल्ने ओलीले बताए।
'यो म्यादी सरकार आफैं ढल्छ। हामीले ढाल्न कुनै कसरत गर्नुपर्दैन,' उनले भने, 'हामी यो सरकारलाई हात पनि लगाउँदैनौं। यो आपसमै ठीक छ र ठीक पनि भइहाल्छ।'
यस्तै, ओलीले गठबन्धनको सरकार केही दिनको पाहुना भएको समेत बताए।
'यो पाहुना भएर आएको सरकार धेरै दिन टिक्ने सरकार होइन,' उनले भने, 'यो सरकार यतिको खन्चुवा छ कि पाल्न पनि महँगो पर्छ।'
