प्रधानमन्त्री पुष्पकमल दाहाल ‘प्रचण्ड’ले विदेशी राम्रो र स्वदेशी नराम्रो भन्ने मानसिकता त्यागे मात्रै राष्ट्रिय अर्थतन्त्रको निर्माण सम्भव रहेको बताएका छन्।
शनिबार काठमाडौंमा आयोजित कर्पोरेट गल्फ तथा आर्थिक परिसंवाद कार्यक्रमलाई सम्बोधन गर्दै प्रधानमन्त्री प्रचण्डले विदेशका अनुभव शिक्षा र दृष्टान्तलाई बढी महत्व दिइनुले पनि मुलुकमा राष्ट्रिय अर्थतन्त्रको निर्माण हुन नसकेको बताएका हुन्।
‘हामीकहाँ विदेशी भन्नेबित्तिकै राम्रो, नेपाली चाहिँ नराम्रो भन्ने मानसिकता पनि देखिन्छ। यसले राष्ट्रिय अर्थतन्त्र निर्माण, समृद्धि र स्वाधीनतालाई सहयोग गर्दैन,’ उनले भने।
प्रधानमन्त्री प्रचण्डले अन्य देशका उत्पादन र त्यहाँका दृष्टान्तहरूलाई पनि बुझ्न जरूरी रहेको तर त्योभन्दा बढी नेपालीले नेपालको इतिहास र अर्थराजनीतिक चरित्र, विशेषता र मौलिकता बुझ्नुपर्ने बताए।
‘विश्वका मोडल र अनुभव पढ्दा हामीले हाम्रो मौलिकतालाई बुझेर सोही अनुसार नीति तय गर्नुपर्छ,’ उनले भने।
उनले नवउदारवाद र समाजवादी अर्थतन्त्रलाई हुबहु अवलम्बन गरेर मुलुकको अर्थनीति बनाउन नसकिने बताए।
‘हामी कुन बाटो जाने भन्ने विषयमा धेरैजसो मान्छेहरू अल्मलिएको देख्छु । हाम्रो संविधानले निजी, साझेदारी र सहकारीको तीनखम्बे अर्थनीति अवलम्बन गरेको छ, यो विश्वका अरू मोडेलसँग हुबहु मिल्दैन,’ उनले भने।
प्रधानमन्त्री प्रचण्डले संविधानमा एकातर्फ नवउदारवादका प्रगतिशील पक्षहरू समावेश भएको र अर्कातर्फ समाजवादमा जाने संकल्प पनि गरिएका कारण ठिक कोणबाट बुझ्नुपर्ने बताए।
'प्रतिस्पर्धा र समाजवाद सँगसँगै जाने प्रणाली हामीले अवलम्बन गरेका छौँ । हाम्रा बुद्धिजीवीहरूको पनि यतातिर बहस कम देख्छु । हामीले खास बहस गर्नुपर्ने र हाम्रो बाटो तय गर्नुपर्ने विषय यहीँनेर छ,’ उनले भने।
